Se hai algo polo que se coñece Baldomar fóra das súas fronteiras ese é San Benito de Palermo, o primeiro santo negro, ao que se lle dedica o santuario desta parroquia begontesa, escenario dunha secular romaría que se segue a celebrar en setembro, conxuntamente coa Peregrina, aínda que lonxe das multitudes de anos atrás.
"Era unha gran romaría, había xente que xa acudía a véspera" detalla o párroco Jesús Domínguez, ao tempo que Manuel Castro Gay, o cura que lle axuda, lembra que "había un templete, que desapareceu coa ampliación da N-VI, onde se celebraba a misa das doce, que era cando se bendecían as vacas".
