Un mozo de Monterroso foi evacuado onte ao hospital lucense Lucus Augusti tras ser rescatado da súa vivenda, na que se rexistrou un incendio.
Os feitos ocorreron sobre as tres e media da tarde nunha vivenda unifamiliar da Praza Rojo Losada. O 112 recibiu aviso do incendio e mobilizou efectivos do GES de Monterroso, bombeiros de Chantada e 061.
Os efectivos do GES de Monterroso foron os primeiros en chegar, entraron na vivenda con equipos de respiración autónoma e evacuaron o home, que se encontraba consciente no interior do inmoble. Nese momento estaba só, aínda que reside coa súa muller e a súa filla.
O lume comezou nun dormitorio e afectou a un colchón e a algunha roupa, pero, grazas á rápida intervención dos efectivos de emerxencias, foi extinguido sen provocar danos graves.
