miércoles. 13.11.2019 |
El tiempo
miércoles. 13.11.2019
El tiempo

Esperanza audiovisual

Para nada contabamos en Galicia que nestes comezos do século XXI teriamos que convivir co feito de que as vacas son entre nós unha especie en extinción e de que non poderiamos sequera producir o leite necesario para o noso autoconsumo. Tampouco podiamos imaxinar que o noso “know how” histórico de país pesqueiro ia chocar coas limitacións da economía globalizada. E todo isto ocorre no contexto en que a economía produtiva revisa profundamente os vellos esquemas industriais e que cando estabamos a punto de entrar na era da industrialaización o mundo cambiou o paso pola aparición das novas tecnoloxías e pola evidencia de que no planeta hai outras zonas máis pobres con individuos dispostos a traballar por menos diñeiro.

Permitídeme esa descrición un tanto caricaturesca da economía global , pero estou seguro que todos entendemos ao que me refiro, e que utilizo aquí para poñer en valor o caracter estratéxico do sector audiovisual para Galicia. O sector audiovisual forma parte da industria cultural, é industria e é cultura, integra todos os elementos tecnolóxicos que dinamizan a sociedade do coñecemento pero sobre todo esta industria basada decisivamente nos recursos humanos nútrese dunha materia prima que á cidadanía de Galicia, cando menos, se nos supón: o talento. Sumemos a iso que dá resposta a unha constante necesidade da condición humana: a de comunicarse e contar historias a nós memos e aos demais. Por iso, Galicia, que chegou tarde a case todo, non pode quedar atrás neste desafío. Sobre todo cando partimos da evidencia do constante crecemento e maduración do sector audiovisual nos últimos vinte anos.

Na actualidade, en Galicia, podemos falar con orgullo e en voz alta no contexto internacional de que audiovisualmente somos bos proveedores, socios e clientes. Todas as fases do proceso da produción audiovisual (excepto os laboratorios fotoquímicos de cinema, en extinción en todo o mundo) son posibles en Galicia porque hai medios e equipos técnicos e artísticos de eficacia contrastada.

Pero tamén temos que ser criticos e dialécticos cos nós mesmos, estes últimos vinte anos rexistran o éxito do sector para abastecer con eficiencia a produción de autoconsumo. Son notables os produtos divulgados por TVG, poñamos como claro exemplo, o amplo seguimento en Galicia das series de produción propia. Agora chocamos coa evidencia de que o propio crecemento da actividade non pode sosterse con ese autoconsumo, nin por orzamentos da tv pública nin por suficiente masa crítica demográfica que faga rendibles as producións destinadas ás salas e o DVD. Polo tanto, é o momento que que demostremos a capcidade para internacionalizar a nosa produción e, sobre todo, no contexto paradoxal dunha crise planetaria na que nunca tantos individuos consumiron tantos produtos audivisuais pero que o cambio de hábitos no consumo pon en crise o modelo de negocio tradicional ante o impacto das novas tecnoloxías e a agresión da piratería.

O desafío non deixa de ser excitante e necesitamos superalo para manter viva a nosa esperanza audivisual que nos poñerá no mundo e na modernidade.

Esperanza audiovisual
Comentarios