Paloma Lugilde, coordenadora da Aula de Teatro do campus, que pon hoxe en escena no Auditorio ‘Animaliños’
Que aborda a obra que poñen hoxe en escena?
Lanza unha mensaxe que está de actualidade porque fala da realidade da crise, da falta de tenrura que hai nos tempos que corremos... O argumento é unha urbanización asolada por caracois, na que os seus veciños están máis preocupados por iso que por problemas que teñen, como o impago dunha hipoteca, maltratos...
Con ‘Animaliños’ arrinca o festival internacional de teatro universitario de Lugo, que dura ata o día 12, que salienta deste certame?
Un dos protagonistas é o teatro de Roberto Vidal Bolaño, a quen está adicado o Día das Letras Galegas. Tres das obras que se representarán son del, como ‘Animaliños’. Outros protagonistas son actores galegos que estudan en centros de arte dramático, que presentarán o día 9 catro microproxectos. Entre eles está a lucense Alba Fernández, que repite cunha obra nova. O ano pasado gañou o premio nacional de teatro do Injuve.