A INTERPRETACIÓN dos comentarios que deixan os lectores dos periódicos en internet é un bo exercicio para entender o coñecemento político que hai do país. Non é científico, pero transloce que boa parte da poboación non sabe como son elixidos presidentes e alcaldes.
Defenden moitos cidadáns que se os electores os poñen aí deben seguir, para rexeitar mocións de censura ou como argumento para que goberne a lista máis votada.
Deberían saber que na democracia indirecta que temos, alcaldes e presidentes autonómicos e do Goberno central non son elixidos polos votos que depositamos, senón polos concelleiros ou deputados que resultan deses mesmos sufraxios.
Entón, recapitulemos: nin Mariano Rajoy, nin Núñez Feijóo, nin López Orozco foron directamente elixidos nas urnas dos colexios electorais, senón no Congreso, no Parlamento galego e e na casa consistorial. Parece que non está de máis recordalo.
