Estase a converter nunha cita obrigada de peche da época estival. O acto que promove a asociación Xermolos e a Irmandade Manuel María dende hai tres anos no Pedregal de Irimia terá o vindeiro 21 de setembro coma protagonista a Avelino Díaz, o Poeta de Meira.
«O Pedregal é o eixe simbólico de toda Galicia, onde nace o pai Miño», destacan os promotores da cita, que ten como única pretensión recordar a algunha figura destacada que entregase parte da súa existencia á cultura, así como a render tributo á identidade galega.
Na primeira edición, Valentín Arias foi a figura sobre a que xirou todo, mentres que o pasado ano, e aproveitando tres décadas de traxectoria, os parabéns e as verbas de alento foron adicadas ao grupo A Quenlla.
Nas dúas ocasións, o artista dos actos sociais, o meirego Manuel Pardo, deseñou sendas esculturas, que permanecen intactas ao paso do tempo no Pedregal de Irimia. Pregoeiro do Vento e a Ara de Prisciliano -na que contou coa axuda inestimable de Valdi- locen fermosas ao carón do Miño, cumprindo, no caso da segunda peza, cunha petición de José Chao Rego.
Para esta ocasión, Pardo creará A man de Irimia, unha peza que xa é a escultura por excelencia destas xuntanzas, e que será entregada previsiblemente ao presidente da asociación Avelino Díaz, Paco Veiga, dado que a meirande parte dos seus familiares están en Bos Aires e outros puntos de América.
«A peza é un galardón que representa esa man que se estende ao mundo desde o Pedregal e está tallada en pedra da nosa Serra de Meira, un material que define dalgunha maneira os trazos característicos da personalidade dos galegos», expón o artista, facendo fincapé en que as cores da obra son as da bandeira de Galicia e as do escudo do Concello meirego que o acolleu, unha mestura de verde esperanza, branco e vermello.
Ademais, e aínda que todavía os diferentes colectivos que organizan a cita non pecharon por completo o programa de actos para esta nova edición, Pardo adianta que tamén ten previsto facer unha exposición con algúns dos seus traballos que «estarán encamiñados a potenciar o Pedregal de Irimia, un entorno único».
O escultor di que esta mostra, que poderá ser visitada por todos aqueles que o desexen, se instalará nun lugar que aínda está pendente de concretar.
Como en calquera acto cultural que se precie, neste evento no Pedregal haberá un oco para as reivindicacións, e tamén para a música. E, por suposto, para os versos que Avelino Díaz adicou á terra a que non puido regresar logo de marchar en busca dunha vida mellor.
No acto participarán caras coñecidas do eido cultural, que asistirán, como xa é habitual, a un xantar de amizade, no que se fará un repaso pola vida do Poeta de Meira. Esta homenaxe pretende servir de apoio para a loita que mantén a asociación que leva o seu nome, que desexa que se lle dedique o Día das Letras Galegas en 2017, coincidindo co 120 aniversario do seu nacemento.
A peza conmemorativa está feita con pedra da Serra de Meira, un material «que define a personalidade dos galegos», di Pardo