JOSÉ DA FERRARÍA, artesán vilalbés
HAI NESTA vida pseudopersoeiros que transcenden aos mass media sen mérito algún, mentres que pola contra existen xentes do común que pasan habitualmente desapercibidas e que prestan sen embargo servizos imprescindíbeis á comunidade. Nos tempos que andamos, de permanente avance tecnolóxico, as grandes superficies van aniquilando o pequeno comercio e as marcas monopolizan paralelamente os recambios a través dos seus técnicos. Cando antes se avariaba un aparello, había sempre alguén na contorna capaz de lle poñer remedio coa finalidade de alongar a súa vida útil, pero, en aras do consumismo, seica a data de caducidade vén hoxe programada de fábrica, de tal xeito que chegada esta á súa fin non queda outra ca repoñelo por resultar máis custosa a reparación.
Mais velaí como aínda quedan na actualidade persoas con oficio coma o vilalbés José Vázquez Otero, José da Ferraría, habelencioso para facer calquera clase de arranxo doméstico, profesional onde os haxa, humilde, honrado e cumpridor coma poucos. Ben sei que non será o único, mais si daqueles que, aínda que non saian nos pregóns ou nos medios, resultan necesarios e merecen a recoñecemento social.
Chema Felpeto é profesor