500 empresas potencian a súa presenza exterior grazas a Pexga

A través das oficinas xa operativas da Rede de Plataformas Empresariais no Exterior (Pexga), iniciativa impulsada conxuntamente pola Consellería de Economía e Industria, a través do Igape, e a Confederación de Empresarios de Galicia (CEG), desenvolvéronse ata agora arredor de 1.800 accións para reforzar a presenza do tecido empresarial no exterior. Ademais recibiron apoio preto de 500 empresas da Comunidade, para iniciar ou consolidar o seu proceso de internacionalización nos mercados onde ten presenza a Rede, que se prevé quede completada, coas 14 plataformas, no presente ano.

Ademais da prestación de servizos de información e asesoramento, as oficinas tamén poden acoller temporalmente ás empresas interesadas mentres preparan a súa implantación nos mercados do seu interese. Así, varias empresas galegas utilizaron como centro temporal de operacións as oficinas de Bogotá, México D.F. e Sao Paulo, para preparar a súa implantación neses mercados.

Desde a posta en marcha das primeiras oficinas, en agosto de 2011, as plataformas de Arxentina, Brasil, Colombia, Francia, México e Rusia realizaron durante o pasado exercicio un milleiro de accións encamiñadas a reforzar a presenza das empresas galegas neses mercados, un volume de actividade que se incrementou substancialmente ao longo dos dous primeiros meses de 2012, a un ritmo de trescentos novos servizos cada mes.

No conxunto destes países resulta especialmente relevante o interese que está a espertar Colombia entre o tecido produtivo galego, un mercado que ofrece importantes oportunidades polo gran desenvolvemento que está a experimentar. Ata o momento dirixíronse á plataforma de Colombia máis de 75 empresas, un número semellante ao das que contactaron coa Rede Pexga en Brasil e México, acumulando entre elas máis de tres cuartas partes da actividade da Rede ata o momento.

Dentro de Europa, Francia, primeiro destino das exportacións galegas, cunha cota en 2011 do 28% das vendas internacionais das empresas de Galicia, foi unha das plataformas cunha elevada demanda de servizos por parte das empresas.

Ademais, as empresas galegas teñen ao seu dispor servizos para facilitar a súa internacionalización en Alemaña, China (Shanghai) e Estados Unidos (Miami), a través de oficinas provisorias que atenderon un importante número de consultas e servizos neses mercados.

Servizos de información, asesoramento e apoio en destino
A Rede Pexga é un proxecto de representación empresarial ao servizo do tecido produtivo galego. Cada unha das plataformas que a integran ofrece información ás empresas co obxectivo de achegar e pór no seu coñecemento as oportunidades que ofrece cada un dos mercados nos que se atopa presente. Tamén informa sobre os aspectos fiscais, xurídicos, laborais e financeiros a ter en conta á hora de implantarse no país, ao tempo que realiza accións de promoción orientadas á captación cara a Galicia de investimentos estranxeiros, que nos tres primeiros trimestres do pasado ano medraron nun 316% sobre as cifras de todo o ano anterior.

Doutra banda, a Rede Pexga ofrece un gran número de servizos individualizados de asesoramento e  apoio a todas aquelas empresas interesadas en reforzar a súa presenza internacional. Entre estes servizos destacan a elaboración de axendas, o apoio en accións puntuais de promoción e a dispoñibilidade das oficinas da Rede para as xestións no país.