viernes. 18.06.2021 |
El tiempo
viernes. 18.06.2021
El tiempo

Lugo proba o novo sistema de seguimento en tempo real do bus urbano

Arroxo, este xoves, nun bus urbano. EP
Arroxo, este xoves, nun bus urbano. EP

Arroxo explica que cando entren en funcionamento as novas liñas os veciños poderán saber cándo pasará o seguinte autobús

O tenente de alcalde de Lugo e concelleiro da área de mobilidade, Rubén Arroxo, realizou este xoves un percorrido no bus urbano para comprobar o funcionamento do seu novo sistema de axuda á explotación (SAE). Trátase da conexión telemática que permitirá o seguimento en tempo real da flota de autobuses, que se está a configurar como paso previo á posta en funcionamento das novas liñas.

Arroxo, acompañado polo edil de infraestruturas urbanas, Alexandre Penas, asegurou que o novo sistema mellorará a accesibilidade, xa que "os propios buses informarán das seguintes paradas". "Unha vez entren en funcionamento as novas liñas, as veciñas e veciños poderán consultar o tempo que falta para a chegada do seguinte bus, tanto a través de 21 pantallas informativas como das aplicacións web que se habilitarán", explicou o tenente de alcalde.

A empresa concesionaria do servizo de transporte público está a realizar probas de funcionamento do sistema, cun bus que realiza o percorrido das novas liñas.

O novo proxecto de mobilidade está composto por catro grandes liñas que conectarán as zonas norte e sur de Lugo, e dúas que conectarán o leste co oeste da cidade. 

Arroxo salientou que, nese punto, tamén se aspira a fomentar o uso da Tarxeta Cidadá no bus urbano, coa que o prezo do billete se reduce de 0,64 euros a 0,45, ou 0,31 no caso de ter dereito a algunha bonificación. En caso de transbordo queda en 0,19 euros.

Lugo proba o novo sistema de seguimento en tempo real do bus urbano
Comentarios