martes. 12.11.2019 |
El tiempo
martes. 12.11.2019
El tiempo

Montserrat Valcárcel (USC): "Queremos ser o campus de referencia do sector primario de Galicia"

Montserrat Valcárcel, vicerreitora de Coordinación do campus de Lugo. MARÍA G. MORADO
Montserrat Valcárcel, vicerreitora de Coordinación do campus de Lugo. MARÍA G. MORADO

A USC e El Progreso organizan o próximo martes, coa colaboración da Deputación, un foro sobre o futuro de Lugo

A universidade precisa dos recursos que lle aporte o tecido empresarial e este do I+D+i que lle poida facilitar a primeira porque a innovación é esencial para mellorar en competitividade. Como é esa relación vaise tratar no foro que se celebrará o próximo martes, a partir das dez mañá, na Casa do Saber de Lugo. Nesta xornada de entrada libre, con tres mesas redondas sobre o sector primario, a mobilidade e as novas tecnoloxías, e a cultura, participarán directivos de empresas de referencia na provincia de Lugo como Lactalis, Pescados Rubén, Adegas Moure, Monbus ou Norvento, entre outras, e personalidades do mundo da cultura como o director de cine Jorge Coira. Montserrat Valcárcel é a vicerreitora de Coordinación do campus de Lugo. 

Que leva á USC a organizar o foro Lugo cara o Futuro? 

Pensamos neste foro e coas temáticas máis relevantes para o campus de Lugo dentro da vocación que temos que ter como Universidade de transferencia de información cara á sociedade, a quen nos debemos. O primeiro faladoiro é sobre o sector primario (o leite, o viño, o forestal e a pesca), porque, dada a nosa especialización como Campus Terra, moitas das nosas investigacións e das nosas titulacións están orientadas cara á terra e o territorio. O segundo é sobre as novas tecnoloxías e a mobilidade; a tecnoloxía é o futuro e desde o noso campus tamén apostamos por iso, de feito para o próximo curso vaise implatar unha nova titulación de Robótica. E o terceiro é sobre cultura. 

Ademais de Robótica, que xa funcionará o próximo curso con 50 alumnos, o actual mapa de titulacións contempla outras tres novas para o campus de Lugo, como marcha a súa implantación? 

Nos casos de Xestión Cultural e de Emprendemento e Tecnoloxía estanse axustando certas modificacións no plan de estudos. O de Bioquímica está máis aberto porque aínda non houbo esa primeira revisión do plan de estudos. Estas tres titulacións estarán listas para o curso 2020-2021. 

Neste foro vaise abordar a transferencia de información da Universidade ao tecido empresarial, estase a lograr? 

No noso campus temos moitísima vinculación. Temos máis de cen empresas coas que temos relación e proxectos a través da Oficina de Investigación e Transferencia. É vital para este campus. Estamos necesitados tanto para investigación como para transferencia que atenda esas necesidades puntuais que teñen as empresas, que cando teñen algún problema concreto acoden á Universidade para ver como o solucionan. Loxicamente, a estrutura das empresas en Lugo é pequena. Nós con este foro queremos tamén darlle visibilidade a estes sectores e ás empresas que son referencia na provincia, intercambiar opinións e ver realmente se o que ofrecemos é o que as empresas necesitan, que demandas teñen... 

Esa relación é bidireccional porque a Universidade precisa das empresas, pero estas recorren á institución académica? 

Cada vez máis. Cada vez se dán máis conta de que é importante coidar o I+D+i, pero certas empresas de pequeno tamaño bastante teñen con estar no día a día e non poden mimar tanto iso. Con todas as empresas de certo tamaño coas que falamos si que ven a necesidade de estar innovando porque estamos nuns tempos cambiantes nos que se necesita irse adaptando e adoitan demandarnos. Ás veces non porque tampouco nos coñecen ben. Temos que darnos máis a coñecer e saber cales son as demandas das empresas. 

Que retos inmediatos ten que afrontar o Campus Terra? 

O que queremos, como campus de especialización, é dar un paso máis. Desde Lugo pretendemos conseguir que sexa un campus de referencia para o sector agroalimentario, forestal e gandeiro de toda Galicia e se é posible máis alá das nosas fronteiras. 

A sangría demográfica e a proliferación de campus están provocando unha mingua de alumnos, como se pode atallar ese problema? 

A sangría demográfica aínda vai ser maior e coa oferta académica que hai en Galicia alguén ten que saír prexudicado. Loxicamente non dá para máis. Por iso é importante atraer alumnado estranxeiro e doutras provincias. Temos que compensalo facendo o campus máis atractivo e que sexa unha opción para calquera mozo de calquera provincia de España e tamén do estranxeiro.

"Estou moi orgullosa de que se acadara a agrupación estratéxica BioReDes"
Profesora de Enxeñaría Agroforestal na Escola Politécnica Superior, a actividade investigadora de Monserrat Válcarcel (O Incio, 1971) está centrada na xestión da auga, con dúas teses dirixidas e máis de 50 artigos publicados. Forma parte ademais dun grupo de innovación docente que promove diversas actividades para contribuír ao fomento das vocacións científicas no alumnado preuniversitario e para establecer unha relación máis estreita entre a comunidade científica e a sociedade. A mediados do ano pasado concorreu no equipo co que o barreirés Antonio López se facía co reitorado da Universidade de Santiago de Compostela. 

O mes que vén cumpre un ano no cargo, que balance fai? 
Un vicerreitor do campus de Lugo ten que estar a todos os temas que xurdan de todo tipo. Tes a sensación de ser multitarea. Penso que se conseguiron cousas. Estou moi orgullosa de que se acadara a agrupación estratéxica de investigación BioReDes. Esta mesma semana conseguimos un dos dous primeiros ‘hubs’ de innovación dixital de Galicia para a interacción entre pemes e Universidade. Ademais, ligado ao polo aeroespacial de Rozas, temos moitas interaccións coa Axencia Galega de Innovación (Gain). E logo na xestión do día a día conséguense pequenos logros.

Montserrat Valcárcel (USC): "Queremos ser o campus de referencia do...
Comentarios