O berro seco, A Galicia de Maeloc ou Galicia no país das marabillas son algúns deses discos totémicos do folk galego asinados por Milladoiro, a banda que mudou todo á hora de crear músicas baseadas na tradición do país e que onte repasou a súa traxectoria nun concerto no Auditorio de Lugo.
A veterana formación -camiña cara aos corenta anos de dedicación á música galega- ten pisado escenarios de todo o mundo. Nesta altura xira por auditorios de Galicia e estará a semana que vén no Festival do Queixo de Arzúa, antes de se embarcar camiño de Italia, xa que esta primavera están citados para levar a Bérgamo a súa particular interpretación de muiñeiras, alalás e alboradas.
Como puido comprobar o público -unhas 300 personas- que se achegou onte ata o Gustavo Freire, Milladoiro foi o grupo que sentou as bases do chamado celtismo na música galega a finais da década dos setenta do século pasado.
Milladoiro ten asinado bandas sonoras -El rey del río ou El bosque animado, entre outras- e pezas como a súa revisión do Alalá das Mariñas, Alborada de Ponte Caldelas ou O ramo verde, que forman parte da propia banda sonora de Galicia das últimas décadas. Os músicos e instrumentistas Nando Casal, Xosé Ferreirós, Moncho García, Harry C., Manu Conde e Manu Riveiro integran a banda na actualidade.
Milladoiro fai valer en Lugo os seus galóns como luminaria do folk galego
A banda repasou este xoves algunha das pezas máis emblemáticas da súa carreira nun concerto no auditorio Gustavo Freire