NO BANCO DO parque e fronte aos parrulos, Miguel Couto fai un repaso de todos os asuntos pendentes que ten a concellería que leva entre mans, a que trata do Urbanismo Sostible.
Unha curiosidade... cal é o motivo polo que me trae aquí?
Estiven a pensar nun escenario axeitado para facer a entrevista e ocurríuseme este. Aquí estase moito mellor que sentados fronte a unha mesa. Cando dirixía Asepeyo, veu un día un directivo e tamén me trouxo ao parque para falar o que tiñamos pendente. Eu quedei un pouco sorprendido e díxome: "Sería un desperdicio non facer uso dun espazo relaxado ao noso alcance para poder falar".
Parece unha contradición: urbanismo e sostibilidade...
Non son contraditorios porque trátase de planificar a cidade hacia un modelo que respecte a biodiversidade, a separación das aguas da chuvia para o seu reaproveitamento, a eficiencia enerxética creando edificios sostibles. Ou sexa, o plan Life-Lugo Biodinámico, que pretendemos facer na Garaballa, un escaparate do modelo de cidade que queremos implantar en Lugo.
Non teñen medo convertir A Garballa nunha reserva de tanta filosofía verde que van levar para alí?
Nin reserva, nin gueto. E, aínda así, que perigo tería se así fose? Supoño que a xente estará encantada de vivir alí como o están os veciños deste parque. A Garaballa ten que ser un espello para o resto da cidade, unha pinga dun modelo para que de aí beban outros noutras zonas de Lugo.
O Garañón será un dos asuntos que levarán máis horas de traballo pero iso non estaba debaixo da alfombra!
E por que levar para A Garaballa a cidade verde cando aínda hai moito verde nunha zona tan céntrica de Lugo como o barrio do Carme?
Nesa zona non se poden facer moitas cousas porque hai as limitacións do Camiño de Santiago e das catas arqueolóxicas que descubriron cousas interesantes como unha cloaca romana. Para aí hai outro plan, o Muralla Miñae, que pretende romper as barreiras entre o río e a cidade con carrís bici, unha pasarela, un paso subterráneo e as pozas termais.
Se puidese facelo sen máis, que edificios tiraría vostede en Lugo?
Os edificios representan momentos e evolucións. Non faría avenidas longas pero a orografía de Lugo, no alto dun monte e entre dous ríos, é o que permite. Aí entraría tamén o debate se se debera ou non edificar pasando o río.
E que opina?
Agora mesmo non é necesario.
Ve moito feísmo?
Antes que falar de feísmo, habería que impulsar que os donos rehabilitasen as vivendas porque hai moitas en abandono ou ruínas.
A tramitación vai lenta, pero moitas veces os promotores presentan documentación incompleta
O seu maior ‘marrón’ será o edificio do Garañón?
Será un dos asuntos que levarán máis horas de traballo pero iso xa estaba aí, á vista, non estaba debaixo da alfombra! Estamos pendentes dun informe para negociar co promotor e tamén se abriu estes días a licitación ás empresas que opten por unha solución alternativa no solar cando se tire.
É consciente tamén de que é moi lenta a tramitación das licenzas?
A tramitación vai lenta, si, pero non é só ese o problema. Moitas veces os promotores presentan a documentación incompleta e noutras hai atrancos de informes que han de presentar ao Concello outras administracións.
Pode ser a súa unha concellería que vexa capados os seus proxectos polas rivalidades políticas entre as distintas administracións?
Non, non creo que se chegue a ese extremo porque o perxudicado sempre é o administrado, que fará un investimento na cidade. Aí non hai xogo político.
Non obstante, moitos dos últimos grandes proxectos urbanísticos en Lugo están a ser bloqueados por diferenzas entre a Xunta e o Goberno central ou o Concello como a intermodal, por exemplo.
Si, pero agora parece que a Xunta xa asume o proxecto do Adif.
E o cuartel de San Fernando?
Ese asunto hai que darlle unha volta. É un Ben de Interés Cultural (BIC) e só admite que se convirta no Museo da Romanización. O caso é que aí a Xunta non colaborou e ata tivemos que facer intervencións no edificio, que se cae.
Hai un barrio no que a Xunta lle colleu a iniciativa ao Concello: o da Residencia.
Si, é zona da Xunta. Hai algunhas dificultades técnicas non moi importantes e en breve terán licenza. Non temos interés en poñer atrancos a isto.
Non lle vai sobrar moito tempo para estar ao tanto de todo...
Xa non me sobra. Non teño tempo libre. Parte das miñas vacacións dediqueinas a coller o pulso aos asuntos do Concello.
E como se desestresa?
Xogando ao pádel e indo a ver os partidos do Breogán cos meus fillos as fins de semana.
Na casa non?
Bueno... din os que me coñecen que cociño bastante ben.
