Adif restablecerá os próximos días o servizo ferroviario entre Zamora e Ourense tras reparar os danos na infraestrutura causados polo accidente rexistrado en La Hiniesta (Zamora) o pasado 2 de xuño, cando un tren Alvia chocou cun turismo que caera sobre as vías desde un viaduto. O seu propósito é recuperar a conexión o fin de semana, o que atrasa lixeiramente o primeiro anuncio, que apuntaba a este venres.
Lugo recuperará así a conexión directa por tren con Madrid. Segundo Renfe, prevese recuperar seis servizos Alvia entre Galicia e Madrid, tres en cada sentido de circulación.
Tras o accidente en La Hiniesta, no que faleceu o condutor do vehículo e un dos maquinistas, procedeuse ao corte da circulación para reparar os danos na infraestrutura. Ademais acometéronse traballos de renovación e modernización no tramo Pedralba de la Pradería-Taboadela-Ourense.
O administrador de infraestruturas ferroviarias asegura que todas as actuacións están finalizadas e só falta que un avaliador independente, segundo marca a lexislación, acredite que o nivel de seguridade dos traballos realizados, que xa foron comprobados por parte dos técnicos de Adif, é acorde á normativa vixente en materia de seguridade ferroviaria.
A supresión do servizo ferroviario, segundo precisa Adif, xa estaba planificada con antelación para realizar unha serie de actuacións relacionadas coa futura entrada en servizo da liña de alta velocidade a Galicia debido ás inducións que xeraría a catenaria desta no sistema de sinalización actual.
Ata que non se retome a circulación Renfe continuará co plan alternativo de transporte por estrada para os clientes dos servizos afectados.
