miércoles. 24.07.2019 |
El tiempo
miércoles. 24.07.2019
El tiempo

Lara Méndez suxire que establecerá reforzos da Policía Local por decreto en San Froilán

Policías locales en el recinto ferial de San Froilán. AEP
Policías locales en el recinto ferial de San Froilán. AEP

Os axentes acordaron o venres nunha asemblea que non farán máis horas extras voluntarias a partir deste luns

A alcaldesa de Lugo e responsable da Policía Local, Lara Méndez, indicou onte a través do seu departamento de comunicación que, se os axentes se negan a facer horas extraordinarias de xeito voluntario, establecerá reforzos por decreto. Recalcou que a seguridade da cidade estará garantida tanto durante as festas do San Froilán como en calquera outro evento que acolla a cidade, así como no día a día. Para as festas, o Concello adoita ter a colaboración da Policía Nacional, que este ano podería incrementarse se os medios locais son menos, como xa sucedeu nalgunha outra ocasión.

Os policías acordaron o venres nunha asemblea que non farán máis horas extras voluntarias a partir deste luns debido a que teñen pendente de cobro todos eses reforzos dende o San Froilán pasado e outros conceptos, como a nocturnidade. O compromiso era que as percibiran este mes, pero probablemente non sexa así porque boa parte deses pagos teñen que ser aprobados polo pleno e o trámite, ademais de ser moi criticado pola oposición, pode que non chegue a tempo.

O goberno prevé someter ao pleno desta semana a aprobación dunha modificación do regulamento das horas extras, para aumentar a cuantía e suprimir a limitación. Méndez deu 24 horas á oposición para que fixeran alegacións, se o consideraban oportuno, pero os cinco grupos políticos -que en xeral están en desacodo con eses cambios- negáronse pola pouca marxe de tempo que se lles deu e acordaron que, se o goberno persistía, votarían en contra.

Por outra banda, o goberno ten que levar ao pleno o pago de varios lotes de horas extras, por pertenceren a 2017, exercicio vencido. Tamén ten que facer unha modificación do orzamento porque este ano xa excedeu o presuposto que tiña para este concepto.

Ante a incerteza de cando se superarán estes trámites, a Policía Local decidiu prantarse.

Lara Méndez suxire que establecerá reforzos da Policía Local por...
Comentarios