Sergio Aller é portavoz da asociación Cultura do País, que hoxe fai un roteiro cultural no centro da capital lucense.
Hoxe fan unha ruta por Lugo. Que fin ten a iniciativa?
É un roteiro pola cidade que ten o obxectivo de visitar puntos de relevancia histórica ou cultural, como a casa onde viviu Rosalía de Castro. A idea central é percorrer os lugares nos que desenvolveron a súa vida persoas relevantes da cultura galega.
A asistencia é libre?
Si. Sairemos ás 16.30 horas da Praza do Campo e pode sumarse quen queira. Iremos parando en distintos puntos para a lectura dun texto alusivo á historia de cada lugar. Acabaremos na Praza Maior, na casa de Luis Pimentel. Visitaranse tamén lugares relacionados con personaxes como Fernán Esquío ou Ánxel Fole, quizais o escritor mellor coñecido pola xente.
Cren que os lucenses descoñecen a historia da cidade?
Cremos que fan falla asociacións culturais precisamente porque hai descoñecemento. O que máis se coñece, e é lóxico, é a historia romana, pero en Lugo hai moitas outras cousas que merece a pena descubrir.
Preparan xa novas actividades?
Queremos facer algún obradoiro relacionado coa música e para o Entroido pensamos en facer algunha actividade relacionada coas máscaras.