A TENDA QUE rexenta, xusto enfronte do centro de saúde de Fingoi, é das máis veteranas de Lugo: ten medio século de existencia. Pero ela, Carmen Boquete González, non sempre estivo alí. Antes de coller este pequeno ultramarinos, dedicou 40 anos da súa vida a outro sector comercial totalmente diferente: a lencería.
Agora, leva preto de 12 anos na alimentación e decatouse de que é un negocio máis sacrificado -porque abre, practicamente, todo o día e todos os días, domingos incluídos-, pero con todo di que é máis gratificante. «Custoume adaptarme pero estoulle moi agradecida á clientela porque me acolleu moi ben e porque é moi fiel. Hai xente que vén todos os días a polo pan e o xornal e, de paso, leva tamén outras cousas. É moito máis sacrificado cá lencería en canto a horarios e a traballo porque non tes descanso, pero compensa. Gústame o trato persoal e, de paso, aconsello aos clientes sobre os produtos máis frescos e sobre como se poden cociñar», comenta.
Carmen despacha na súa tenda unhas 250 pezas de pan ao día. Ao seu negocio, concorren varias panaderías como O Pan Artesán do Manuel, Chousa, Lino Cobas ou Madrid en Lugo. «Aquí véndese moita froita e moito pan. Tamén teñen moita saída o embutido galego e as verduras do país», conta.
