Corrupción, prevaricación, suborno... Ben poderían ser os novos ingredientes máxicos para loitar contra eses michelíns que xa se instalaran comodamente na vida dalgúns. Sobre todo cando quen os inclúe na dieta é un xuíz que logra que a posibilidade de acabar entre reixas abafe máis que ter que meterse no bañador. Que trema pois o francés Dukan, porque ao seu controvertido réxime saíulle un rival: a bautizada como dieta do imputado.
Son varios os exemplos que nos confirman o tópico de que, á hora de adelgazar, máis vale levar un bo disgusto que pasar fame ou matarse a suar no ximnasio. E se non que llo pregunten a campións como Jorge Dorribo ou Pepe Blanco, aos que a mestura de tensión e nervios lles custou a barriga e sumar canas en tempo récord. Iso si, o ex ministro xa perdera os primeiros quilos coa dieta Dukan, da que deu o salto á do imputado.
ASÍ FOI O ANTES E DESPOIS DE DORRIBO ...
... E ASÍ O DE BLANCO
E que dicir do xenro do Rei. A Urdangarín a imputación polo caso Nóos deixoulle un tipo fino, se ben presenta un aspecto moi demacrado. E é que xa se sabe, os quilos mellor perdelos pouco
a pouco e, a poder ser, non facelo camiño do xulgado.
URDANGARIN, MÁIS 'CHUPADO' CA NUNCA
A ANÁLISE
“Adelgazan debido ao estrés, pero tamén ao deixar de ir a actos con espetos e viño”
A xa coñecida como dieta do imputado tampouco pasou desapercibida a ollos dos expertos en nutrición. A dietista pontevedresa Silvia Massetti explica que esta só aparece en situacións extremas como polas que están pasando Dorribo, Blanco e Urdangarín.
“Cando unha persoa atravesa por un momento de angustia ou está baixo moita presión, como estes señores, ese estrés inflúe directamente no seu metabolismo, na maioría das veces quitándolle o apetito”, indica. Porén, engade que a isto hai que sumar un cambio de hábitos asociado á hora de explicar tan chamativa perda de peso. “Esta xente pasa de ir a actos e ceas con espetos e viños, co conseguinte picoteo diario, a recluírse máis na casa”, de forma que menos vida social equivale a menos quilos.
Iso si, Massetti informa de que, unha vez inmersos no proceso xudicial, hai alimentos que poden servir de aliados para sobrelevar mellor a situación. “Ante este nivel de estrés recoméndase unha dieta moi natural –peixe, verduras, froita e cereais–, evitando a toda costa
comidas moi elaboradas ou preparados que inclúan graxas.
É clave non probar o alcohol nin o picante a fin de non sumar un malestar gástrico á situación, xa de por si complicada. A dietista destaca, en todo caso, que estamos ante unha dieta “que é
consecuencia de algo extremo non desexado”, polo que resulta moi insán. “O recomendable
é perder un ou dous quilos á semana; todo o que supere iso non é bo; de aí o aspecto demacrado destes imputados”, di.
Iso si, advirte: “Se regresan á normalidade recuperarán os quilos coa mesma facilidade que os perderon”.