O excoordinador de Marea Pontevedra, Xoán Hermida, anunciou este xoves en rolda de prensa a súa renuncia á acta de deputado que lle correspondería no Parlamento de Galicia no caso de que a parlamentaria de En Marea Paula Quinteiro presente a súa dimisión, como reclaman o portavoz do partido instrumental, Luís Villares, e a dirección da organización rupturista.
Así, asegurou que era "consciente" desde que se coñeceu o incidente que protagonizou Quinteiro —que chegou a esgrimir o seu carné de deputada nun control policial por vandalismo durante a noite do 18 de marzo en Santiago— que "os focos e o lume cruzado da contenda política ía porse" sobre el debido a que é o seguinte na lista electoral desta formación.
Hermida, que ocupou o número seis da lista de En Marea por Pontevedra nas eleccións autonómicas de 2016 —nas que o partido instrumental obtivo cinco escanos—, referiuse á filtración aos medios dun suposto enfrontamento que mantería na cidade de Pontevedra con axentes da Policía Municipal que o estaban multando.
"Obviamente non podo dimitir de nada porque non teño ningún cargo institucional", dixo Xoán Hermida, que, a continuación, engadiu que "tampouco" ten "nada que rectificar" sobre o mencionado asunto "porque non hai caso". No entanto, xustificou a súa decisión de dar un paso ao carón como unha "lección" pensando "na ética que debe ter En Marea".
"Eu sempre digo que non hai política sen ética", apuntou Xoán Hermida, que situou a súa decisión no contexto da "democracia europea", para logo reiterar o seu compromiso persoal con Marea Pontevedra e cos movementos sociais aos que pertence.
Deste xeito, no caso de que finalmente Paula Quinteiro decida renunciar á súa acta como deputada, o posto recaría en Julia Torregrosa, responsable de Educación en Podemos Galicia e tamén membro de Marea Pontevedra.
TRANSPARENCIA E VERACIDADE"
Xoán Hermida dimitiu fai sete meses do seu cargo como coordinador en Marea Pontevedra debido a que as súas "obrigacións profesionais e persoais" non lle permitían "atender ese posto". Do mesmo xeito, segundo explicou este xoves, estas mesmas circunstancias lle impidirían agora desempeñar o labor de diputad na Cámara galega en caso de producirse a renuncia dalgún dos actuais representantes de En Marea por Pontevedra.
Así as cousas, teorizou con que "a transparencia e a veracidade" que debe ter un representante público que, ao seu xuízo, e aínda que remarcou que non é o seu caso, "non debe ter vida privada" e que se debe dar contas do que pasa "desde o minuto cero".
Nesta liña, Hermida di que, cando recibiu esas dúas multas por parte da Policía Municipal, publicou no seu perfil de Facebook que se trataron de sancións por aparcadoiro indebido mentres levaba ao seu pai a un centro de maiores próximo e, a segunda infracción, foi por non levar posto o cinto de seguridade.
A primeira multa pagouna pero a segunda está recorrida nun contencioso e foi obxecto dun escrito dirixido ao intendente xefe da Policía Local, Daniel Macenlle, no que protesta pola actitude que tiveron os axentes municipais.
Esta queixa derivou na apertura dun expediente informativo a un dos policías, segundo explicou Xoán Hermida, que acusou a un dos axentes de "na súa lexítima defensa, invéntase unhas declaracións" que foron recollidas pola prensa.
DIFERENCIA O SEU CASO CO DE QUINTEIRO
Xoán Hermida expresou que "hai que diferenciar entre documentos públicos e privados", xa que un atestado policial como o referido a Paula Quinteiro é público, mentres que, segundo puntualizou, o expediente interno aberto a un funcionario é un informe privado. Deste xeito, incide en que, ao ser filtrado á prensa, "está a vulnerarse por parte do Concello de Pontevedra un dereito básico á privacidade".
"Non é o primeiro caso", dixo en referencia á filtración que afectou á concelleira de Ciudadanos nesta cidade, María Rey, que foi denunciada en 2014 por falsear un cartón de discapacidade e así poder aparcar nas zonas reservadas para este colectivo.
"O Concello de Pontevedra compórtase como un réxime soviético que persegue aos adversarios políticos", acusou Hermida, circunscribindo esta actuación nun momento no que o Goberno local do BNG "ten moito medo" a que Marea Pontevedra "póidalle arrebatar a Alcaldía da cidade".
Por último, apuntou que non descarta que a súa queixa contra o Concello pola filtración do seu caso poida derivar nunha denuncia penal.
