Villares matiza que non lle deu un "ultimato" a Quinteiro pero pide que a decisión "non se alargue no tempo"

O portavoz de En Marea asegura que a consulta ás bases sobre a continuidade da deputada tería unha "indubidable lexitimidade"

Luís Villares. PEPE FERRÍN (AGN)
photo_camera Luís Villares. PEPE FERRÍN (AGN)

O portavoz orgánico e parlamentario de En Marea, Luís Villares, matizou que non deu un "ultimato" a Paula Quinteiro, a deputada que se viu envolta nun altercado coa Policía, para que presentase a súa dimisión, pero remarcou que a decisión definitiva sobre a súa continuidade non debe "alargarse no tempo". 

Nunha entrevista este domingo en RNE recollida por Europa Press, Villares negou que o pasado luns, cando compareceu ante os medios após case dúas semanas de silencio para pedir a renuncia de Quinteiro en contra da opinión da maioría do Grupo Parlamentario, fixase un prazo dunha semana para que a inscrita de Podemos tomase unha decisión sobre o seu futuro. 

"Eu expliquei que isto tiña que resolverse nun prazo prudente de tempo. Non se trata dun ultimato, non está na miña man facelo, está na man dos órganos colexiados de En Marea facelo. Pero si que creo que é necesario que isto non se alargue demasiado no tempo", asegurou este domingo, un día antes de que se cumpra unha semana desde as súas declaracións públicas nas que expresou a súa postura, que coincide coa que mantén a dirección orgánica do partido instrumental. 

Deste xeito, apelou a que o conflito, que abriu un cisma no seo do Grupo Parlamentario e avivado a división que existe desde fai máis dun ano no espazo político de En Marea, se resolva con "madurez" e "altura política" por parte de "quen ten que tomar a decisión, que é a compañeira deputada".

CONSULTA ÁS BASES. No caso de que Quinteiro, que conta co respaldo de once dos 14 deputados do Grupo Parlamentario e do sector crítico coa dirección do partido instrumental, non presente a súa dimisión; Villares abriu a porta a someter ás bases a continuidade de Quinteiro a través da convocatoria dunha consulta telemática. 

A posibilidade deste extremo xerou malestar entre o grupo de En Marea no Parlamento de Galicia –a secretaria xeral de Podemos Galicia, Carmen Santos, chegou a cualificalo de "tolemia"–, xa que consideran que a decisión última sobre a continuidade de Quinteiro corresponde ao grupo e que a revogación de cargos por parte das bases non está desenvolvida no regulamento interno do partido instrumental. 

"O que fixen o outro día foi expor posibles solucións adicionais desde o carácter político se é que nalgún momento prodúcese unha aparente contradición entre a posición maioritaria do Grupo Parlamentario e o espazo orgánico", declarou este domingo Villares. 

Nesta liña, argumenta que "se se produce" esta disparidade de criterio trataríase dun "falso dilema", xa que "tanto a lexitimidade do grupo como do espazo orgánico" parte da "vontade" dos inscritos, que son quen escolleron tanto as listas para as eleccións autonómicas de 2016 como, meses máis tarde, a composición do Consello das Mareas, órgano máximo de dirección entre plenarios. 

Deste xeito, o maxistrado lucense remarca que "existe unha base común de lexitimidade" entre os representantes públicos de En Marea e os dirixentes orgánicos do partido instrumental, polo que, ao seu xuízo, "ninguén pode discutir" a "indubidable lexitimidade" das bases "para opinar" sobre a continuidade de Paula Quinteiro. "Os inscritos son os que máis ordenan en En Marea", apostilou.

PEDIRÍA A DIMISIÓN SE FOSE DOUTRO PARTIDO. "Si pediría a súa dimisión, esa sería a miña opinión", respondeu Villares á pregunta de se reclamaría a renuncia dun parlamentario doutro partido que se vise envolto nunha situación como a de Quinteiro, definida polo alcalde de Santiago, Martiño Noriega, como "incidente menor" como, segundo o rexedor, así llo trasladaron os mandos da Policía Local. 

En canto a isto último, o portavoz de En Marea asegurou que "se cadra" poida tratarse dun asunto "menor" no plano penal ou xudicial pero, ao seu entender, é "relevante" a nivel político porque "compromete os principios, a palabra e o código ético" do proxecto político que representan. 

"SEGUIREI AQUÍ". "Mentres teña a confianza da xente que creu en min e que me encargou esta responsabilidade que exerzo con moita honra, seguirei aquí", asegurou Villares á pregunta de se se expón a súa renuncia para volver á xudicatura, onde recoñeceu que "viviría máis tranquilo pero facendo unha función moi diferente". "Esta hónrame moito", engadiu en referencia á súa carreira política. 

MIGUEL TELLADO. Precisamente o secretario xeral do PPdeG, Miguel Tellado, cuestionaba este domingo desde a convención nacional do seu partido en Sevilla que En Marea poida presentarse na sesión plenaria desta semana con Villares e Quinteiro "convivindo no mesmo grupo".  "Este domingo é o último día para que o portavoz lle ensine a porta a de saída á súa deputada ou deberá collela el mesmo", sinalou Tellado.

Comentarios