O conselleiro de Cultura e Turismo, Roberto Varela, recoñeceu este martes o erro cometido en Fitur ao referirse á localidade de Sobrado dos Monxes como 'Deván de los Monjes' pero asegurou que "en ningún caso" fora "consciente" do devandito fallo, que achacou ao cansazo de participar nunha ducia de actos durante a xornada promocional. En todo caso, tardou dúas semanas en admitilo, desde que se fixo público o vídeo no que se escoita como o titular de Cultura promociona o municipio coruñés cun topónimo 'traducido' ao castelán.
"É un feito máis que pechado e a miña conciencia está tranquila", proclamou Varela durante a súa comparecencia na Cámara para explicar os actos organizados con motivo do Ano do Libro e da Lectura. O conselleiro recordou que chamara ás deputadas da oposición e pedira desculpas "de inmediato", pero rexeitou as acusacións da portavoz de Cultura do BNG, Ana Pontón, de que mentira en sede parlamentaria, cando respondeu á oposición que "hai que ser estúpidos para pensar que eu vou dicir Desván de los Monjes".
Un ''pobre argumento''
De feito, aludiu a "un erro estilo Psicopatología da vida cotiá de Freud" e lamentou que a oposición use este "pobre argumento" para criticar a súa xestión.
Respecto diso, a nacionalista Ana Pontón censurou a "baixa calidade democrática" do Goberno galego, xa que non só conselleiros como o de Cultura senón tamén "o propio presidente da Xunta mentiu" na Cámara. Cualificou as declaracións do conselleiro como "moi graves" e asegurou que "só rectifica porque o obrigan".
A deputada do BNG acusou ao conselleiro de Cultura de "pretender converter o Parlamento nunha fraude" e reprochoulle que non ten "credibilidade" nas súas declaracións por ser "reincidente nas súas teimas contra a cultura galega". Ante a "deturpación" da toponimia practicada por Varela, Ana Pontón incidiu en que "debería ter algún tipo de responsabilidade política".
