A asociación canaria sen ánimo de lucro UP2U Project, que ten como iniciativa principal o Camiño dos Valores para fomentar a inclusión social dos mozos, abriu a súa delegación en Galicia. Estará presidida polo xuíz José Antonio Vázquez Taín.
A maxistrada do Xulgado de Menores Número 1 das Illas Canarias, Reyes Martel, que é tamén a presidenta de UP2U Project, anunciou a noticia este sábado no compostelán Centro de Acollida ao Peregrino. Acompañárona o xuíz José Antonio Vázquez Taín e o conselleiro de Cultura e Turismo, Román Rodríguez.
"O Camiño dos Valores", tal e como o denominou Martel, ten dous partes: "Unha está en Gran Canaria, onde hai dúas igrexas Xacobeas, e a outra en Santiago, onde chegamos polo Camiño Inglés". "A asociación trata de levar polo bo camiño a mozos e mozas que cometeron erros", apuntou a presidenta da mesma. Os participantes realizan o Camiño como unha actividade para aprender valores e "mellorar como cidadáns".
"Con esta iniciativa tentamos tamén que os menores non cheguen a estar na situación de pasar por unha fiscalía. Por iso, abrimos esta idea aos mozos en xeral, especialmente aos máis vulnerables, declarados en desamparo e pertencentes a familias en risco de exclusión social", detallou Martel.
"Ter esta delegación aquí permitirá trasladar aos mozos os valores e a esencia dos peregrinos, algo que en Canarias nos é imposible", continuou a xuíza, quen engadiu que "da delegación forman parte un grupo multidisciplinar do que forman parte avogados, xuíces e traballadores sociais". Para finalizar a súa intervención, Martel anunciou que os 200 mozos canarios que participan nesta iniciativa virán en outubro a Galicia.
"SOLUCIONAR PROBLEMAS". Para o xuíz Vázquez Taín, esta é unha oportunidade de "solucionar problemas de verdade" máis aló do seu traballo, consistente en gran medida en "burocracia e en resolver expedientes, a pesar de ser moi difícil" e entrañar "moitísima responsabilidade".
"Cando te enfrontas a un problema tes que chegar a coñecelo mellor, mesmo, que os que están involucrados nel", expresou o xuíz. "Fronte ao 5 ou 10% de recuperación que hai entre os maiores de idade que delinquen, nos mozos esta porcentaxe de rapaces que non volven delinquir pode chegar ao 60 ou 80%", asegurou.
Por todo isto, Vázquez Taín puxo especial énfase na necesidade de "saber onde hai que atallar o problema" para, como di a Constitución Española, "lograr a reinserción social, que é o fin da pena".
Pola súa banda, o conselleiro Román Rodríguez destacou o "valor" que ten asociar o Camiño a valores como "o coñecemento, a tolerancia e o respecto". "É moi importante favorecer a inclusión de mozas que, en moitos casos, non teñen a culpa da súa situación", engadiu.
"O feito de que o Camiño poida servir para axudar a que algúns mozos e mozas poidan reinventarse e ter unha segunda oportunidade ou outra visión na vida é algo único no mundo", recoñeceu o conselleiro.
