O PSdeG-PSOE agarda que, en virtude do acordo para a gobernación dos concellos subscrito co BNG, os nacionalistas non formalicen a inscrición dos grupos municipais no rexistro dos concellos de Muros, Corcubión e Porto do Son.
Os socialistas confían en que o BNG "non permita o uso das súas siglas nin se sinta representado polos concelleiros elixidos nas listas nacionalistas que racharon o acordo" que comprometía a ambos partidos a favorecer o acceso á alcaldía á lista máis votada das dúas formacións. O PSdeG lembrou que actuaron "con rapidez e contundencia en Pontecesures polo que o lóxico sería que estes concelleiros pasen a integrar o grupo de non adscritos".
O BNG, pola súa parte amosou a súa satisfacción pola medida adoptada en Pontecesures, afirmando ante as reclamacións dos socialistas que eles "anunciaron o mesmo día en que se constituíron os concellos que abrirían expedientes con proposta de expulsión" ós concelleiros que se afastaron do pacto.
