O metro cadrado en Galicia supera por primeira vez os 1.500 €. Nos últimos tres meses o prezo da vivenda nova subiu na comunidade unha media do 2'5%, situándose na media dos 1.512€ por metro cadrado. Malia romper esta barreira, confírmase a "aterraxe" dos prezos da vivenda, coa menor suba dende o ano 1998.
Á luz destes datos, Galicia sitúase como a cuarta comunidade na que máis se incrementou o prezo da vivenda nos últimos tres meses. Só Asturias (+4,2%), Extremadura (+3,9%) e Murcia (+2,8%), rexistraron incrementos máis elevados que Galicia. A suba rexistrada na comunidade galega foi un punto superior á media española, posto que no conxunto do estado o prezo da vivenda incrementouse un 1,5%.
Prezos
Se en Galicia o prezo do metro cadrado se situaba en xuño en 1.512 €, a media estatal marca un custo bastante máis elevado: 2.055 €. As provincias galegas máis caras para adquirir un inmoble seguen a ser Pontevedra (1.683) e A Coruña (1.519,5). En Lugo o custo do metro cadrado sitúase en 1.128,2 € e en Ourense nos 1.107,6 €.
As comunidades do estado coas vivendas mais caras son Madrid e País Vasco, que rondan os 3.000 € por metro cadrado, seguidas de Cataluña e Baleares que superan os 2.300 €.
Suba anual
No conxunto dos últimos doce meses, a vivenda libre encareceuse en Galicia un 7,5%. Este incremento, de 106 € por metro cadrado, sitúa á comunidade galega como a cuarta cunha maior suba no prezo dos pisos. No conxunto do Estado, os pisos subiron un 5,8% no último ano.
