O programa de voluntariado ambiental da Xunta celebrou a xornada que rende homenaxe á entrega solidaria coas mans na masa. Decidido a facerse máis grande e a superar as barreiras das estacións, o proxecto chegou ao Día Internacional do Voluntariado —conmemorado o sábado— estreando a súa ampliación á tempada invernal e entrando por primeira vez nas Fragas do Eume, para contribuír ao coidado dun parque natural cun valor ecolóxico incalculable. Alí, para conservalo, estaban o sábado oito mozos, que seguirán ata o vindeiro día 11 sobre o terreo dedicados a erradicar plantas ‘invasoras’ para asegurar o futuro da vida autóctona.
O grupo púxose mans á obra o venres no marco do programa posto en marcha de forma conxunta polas consellerías de Política Social e de Medio Ambiente, que quixeron estar cos voluntarios no seu día. Por iso o sábado recibiron a visita das directoras xerais de Xuventude e, Participación e Voluntariado, Cecilia Vázquez, e de Conservación da Natureza, Ana María Díaz. Os mozos son unha avanzada do que pode ser un proxecto consolidado no futuro, porque forman parte dunha «quenda experimental» que leva o programa da Xunta máis aló da súa actividade habitual, en tempada estival, no Parque Nacional das Illas Atlánticas.
O equipo está dedicado estes días a tarefas de erradicación de plantas alóctonas, que nos últimos tempos ameazan especies como o carballo ou o castiñeiro. A iniciativa está coordinada por técnicos de Medio Ambiente e fai posible que os mozos, ao tempo que gozan dun espazo privilexiado, axuden ao seu coidado e mantemento. E nesa combinación está precisamente a esencia do programa da Xunta.
O programa autonómico, circunscrito ata agora ás Illas Atlánticas, esténdese por primeira vez á tempada invernal e a novos espazos
Os voluntarios teñen cuberta a manutención, o aloxamento e o material necesario para desenvolver o seu labor, ademais de contar cun seguro de accidentes e de responsabilidade civil. Ao finalizar a actividade poden obter un certificado acreditativo e a súa actuación será inscrita como experiencia no Rexistro de Acción Voluntaria de Galicia. Ese ‘arquivo’ e o historial do programa ambiental evidencian que, como salientou Cecilia Vázquez, na sociedade galega existe implicación e disposición para participar en accións solidarias e de voluntariado.
«Este programa fai posible canalizar a través do voluntariado a participación activa da sociedade no coidado e na conservación dos ecosistemas, ao tempo que permite aos voluntarios gozar dos parques naturais galegos e dos seus valores», sinalou na súa visita a directora xeral de Xuventude, Participación e Voluntariado, quen valorou a axuda nas tarefas de recuperación da diversidade. Afondou nesa liña Ana María Díaz, para cualificar ese tipo de iniciativas de «imprescindibles» e destacar que implican a sociedade no coñecemento e na protección do medio ambiente, unha das principais liñas de actuación promovidas pola consellería do ramo.
O grupo das fragas recibiu o sábado, o Día do Voluntariado, unha visita das directoras xerais de Conservación da Natureza e de Xuventude
Illas atlánticas. Con eses resultados, a experiencia nas Fragas do Eume amplía un programa circunscrito ata agora ás Illas Atlánticas, que acolleron entre os meses de maio e agosto unha serie de actividades nas que participaron 291 voluntarios maiores de 16 anos. O seu labor —nas Cíes, Ons, Sálvora e Cortegada, con catro accións diferentes— estivo coordinado polos técnicos do parque nacional e centrouse especialmente na colaboración en tarefas de oceanografía e recursos mariños, fauna e flora, aínda que tamén foi máis aló.
De feito, algúns grupos serviron de apoio en tarefas de guía e de información, na limpeza de praias e na vixilancia de incendios, así como no apoio ás persoas con diversidade funcional que visitaron as illas Cíes, por exemplo.