O líder e fundador dos coñecidos como Miguelianos, Miguel Rosendo, atópase en liberdade provisional á espera de sentenza despóis de pasar catro anos de prisión preventiva acusado de abusos sexuais a consagradas da Orde e Mandato San Miguel Arcanxo e este venres compareceu para asegurar que non cometeu "abusos de ningún tipo, nin sexuais nin mentais". "Non tiven nin terei abusos de ningún tipo nin sexuais nin mentais, para comer a cabeza ou dicir 'se ti saes desta obra vanche ocorrer cousas malas', é de parvos", subliñou nunha rolda de prensa en Madrid.
Pola súa banda, o avogado de Rosendo, Marcos García-Montes, mostrouse convencido de que a sentenza se coñecerá en poucas semanas e confía en que esta sexa "máis que favorable, congruente ás probas achegadas" durante o xuízo. "Esperamos que se faga xustiza. Non queremos vinganza pero tampouco podemos mirar a outro lado e no xuízo déronse versións surrealistas", afirmou o letrado.
Rosendo saíu en liberdade provisional o pasado 5 de decembro, á espera de que a Audiencia Provincial de Pontevedra dite sentenza. Durante o últimos catro anos estivo en prisión preventiva, un tempo no que asegura que pasou por momentos "moi malos".
O ministerio fiscal pide 66 anos de prisión para Miguel Rosendo por un delito de asociación ilícita, 12 contra a integridade moral, cinco de coaccións e tres contra a liberdade sexual —un de agresión sexual continuado e dúas de abuso sexual continuado—. Pola súa banda, a acusación particular solicita un total de 82 anos de prisión para o líder dos Miguelianos.
