Lunes. 12.11.2018 |
El tiempo
Lunes. 12.11.2018
El tiempo

Gonzalo Caballero di que a súa "prioridade" está en Galicia e non no novo Goberno

Gonzalo Caballero Míguez (Ponteareas, 1975). PEPE FERRÍN (AGN)
Gonzalo Caballero Míguez (Ponteareas, 1975). PEPE FERRÍN (AGN)

Defende que Pedro Sánchez "recoñece as singularidades culturais de Cataluña, País Vasco e Galicia"

O secretario xeral do PSdeG, Gonzalo Caballero, reivindicou que a súa "prioridade está en centrada en Galicia" ante a posibilidade de que o novo presidente do Goberno, Pedro Sánchez, poña os seus ollos nel á hora de configurar o seu Executivo. Caballero, nunha entrevista na Cadena Ser este domingo, evitou pronunciarse sobre os nomes que se barallan para a configuración do novo equipo de Goberno despois de que saíse adiante a moción de censura presentada polo Partido Socialista e que puxo fin ao mandato de Mariano Rajoy.

"Non debo entrar en nomes, hai moitas quinielas, eu sei como está a cuestión, pero poñer nomes, faría un mal favor ao partido", apuntou cuestionado sobre se un deses nomes podería ser o da galega Pilar Cancela. "Hai que esperar á decisión que tome Pedro Sánchez. Hai moitísimos compañeiros, como Pilar, pero moitos outros, que poderían ocupar un ministerio", apostilou.

Caballero restou importancia á presenza de mandatarios galegos no equipo de Pedro Sánchez e remarcou que, aínda que di estar "a disposición" de Ferraz, a súa "prioridade" está en Galicia. "Temos que facer un proxecto de cambio en Galicia", engadiu, para despois apuntar a "plena sintonía" que existe "entre a dirección estatal e galega".

O EXEMPLO DE TOURIÑO. Nesta liña, o líder dos socialistas galegos puxo como exemplo o acontecido con Emilio Pérez Touriño, secretario xeral do PSdeG entre 1998 e 2009, e que, após o desembarco de José Luis Rodríguez Zapatero na Moncloa en 2004, non foi nomeado para ocupar ningún cargo de responsabilidade co Goberno socialista. "Touriño quedou percorrendo o país e un ano despois foi presidente da Xunta", lembrou.

O economista vigués remarcou que desbancar a Rajoy do Goberno central era necesario para que non se instalase un clima de "impunidade" logo da sentenza da Gürtel que condenou ao PP como partícipe a título lucrativo dunha rede de corrupción.

Para Caballero, unha das "prioridades" que debe ter Pedro Sánchez á fronte do Executivo é "rexenerar" a vida política en España. "Creo que facía falta este cambio, que é un cambio positivo. As prioridades pasan por retirar o nivel de corrupción do PP e avanzar nunha liña de exemplaridade política, e abrir pontes de diálogo dentro do marco constitucional", incidiu.

GALICIA E FEIJÓO. Entre as cuestións que deberá abordar o novo goberno socialista figuran, no tocante a Galicia, o traspaso da AP-9 que apoian todas as fases políticas con presenza no Pazo do Hórreo, que aprobaron por unanimidade reclamar a titularidade autonómica desta infraestrutura. No entanto, o Goberno de Mariano Rajoy impuxo un veto no Congreso ao debate da transferencia da AP-9.

Gonzalo Caballero recoñece que o traspaso da AP-9 é unha cuestión "moi relevante", pero evitou aclarar se o novo Goberno socialista apoiará transferir a infraestrutura a mans da Xunta. "Vanse abrir novas oportunidades para todo, o venres cambiou a historia do país, o da AP-9 é moi relevante, pero o debate político vai ser moi intenso", afirmou.

"O que si está claro é que cando gobernamos os socialistas a Galicia foille mellor", reivindicou o líder do PSdeG, que vaticina que Alberto Núñez Feijóo "vai perder o Goberno de Galicia, ou porque se vai a Madrid ou porque vai perder as eleccións". Deste xeito, cre que Feijóo "leva na súa campaña de márketing persoal bastante tempo" centrado "na loita pola sucesión" de Mariano Rajoy e deixando ao carón a "defensa" dos intereses de Galicia, que "necesita un proxecto de futuro".

ESTADO PLURINACIONAL. Un dos retos que se lle abren a Pedro Sánchez ao mando do Goberno central é afrontar a situación aberta en Cataluña e o encaixe das nacionalidades históricas na estrutura do Estado. Para Gonzalo Caballero, o presidente español "recoñece as singularidades culturais de Cataluña, o País Vasco e Galicia". Ademais, defende que Galicia "non" vai perder posicións respecto de Cataluña e Euskadi no debate territorial.

Gonzalo Caballero di que a súa "prioridade" está en Galicia e non...
Comentarios