A comunidade galega pásase ao marrón

O contedor marrón, coñecido xa popularmente como o quinto contedor, é o protagonista induscutible da Semana Europea da Prevención de Residuos 2022, que arrincou este sábado e que se prolongará ata o vindeiro domingo 27. No caso de Galicia, da man da Sociedade Galega do Medio Ambiente (Sogama) e da Consellería de Medio Ambiente, Territorio e Vivenda, este novo elemento introducido na recollida selectiva e destinado á materia orgánica centrará o groso da programación ambiental desta semana, que aínda que se celebra en clave autonómica focalizarase na Mariña.

Baixo o lema O Marrón, o contedor que devolve vida, as accións contempladas na campaña promovida por Sogama e a consellería orientaranse específicamente aos quince concellos que, sobre o papel, utilizarán os servizos da planta de biorresiduos que se está a levantar en Cervo. Trátase de Alfoz, Barreiros, Burela, Foz, Lourenzá, Mondoñedo, Muras, Ourol, Ribadeo, O Valadouro, O Vicedo, Viveiro e Xove, ademais do municipio coruñés de Mañón e do propio Cervo. No entanto, a intención de Sogama e estender algunhas das accións da campaña a outros dez concellos próximos para que coñezan con detalle os pormenores deste novo contedor que o próximo ano atoparán moitos cidadáns nas súas rúas.

O lema da campaña deste ano é 'O marrón, o contedor que devolve vida', ao transformar material orgánico en compost

Xornada central

O acto central desta Semana Europea da Prevención de Residuos será unha xornada informativa prevista para o xoves 24 na casa da cultura de San Cibrao (Cervo), para instruír os representantes locais na normativa aplicable e operativa a levar a cabo coa introdución do quinto contedor.

Un portavoz do departamento autonómico será o encargado de explicar as obrigas legais dos concellos respecto da valorización da materia orgánica, mentres que un técnico de Sogama exporá o modus operandi da instalación e tecnoloxía coa que se dotará á mesma para que leve a cabo o seu labor de forma eficiente.

O encontro, que estará presidido pola directora xeral de Calidade Ambiental, Sostibilidade e Cambio Climático, Sagrario Pérez- Castellanos, contará tamén coa presenza do presidente executivo de Sogama, Javier Domínguez Lino, e do alcalde de Cervo, Alfonso Villares.

Así mesmo, o programa contempla a intervención de representantes dos concellos de Carballo e A Laracha, ambos os dous pertencentes á provincia de A Coruña, e que xa teñen instaurado o contedor marrón, de xeito que poderán achegarlle aos asistentes os seus coñecementos, bagaxe, experiencias e estratexia. O obxectivo é que expliquen como están a facer a recollida selectiva da materia orgánica, con que frecuencia, características dos camións utilizados, tipo de contedores situados nas rúas e como canalizaron as distintas accións a nivel administrativo, entre outras cuestións.

A xornada, que dará comezo ás 10.30 horas, culminará cunha visita dos asistentes ás obras da futura planta de biorresiduos que se está construíndo no polígono industrial de Cuíña (Cervo) e que xa vai moi avanzada.

A nova planta

Cun investimento de 6,4 millóns de euros, a planta de biorresiduos de Cervo ocupará uns 8.000 metros cadrados do polígono industrial de Cuíña, en San Cibrao, e disporá de capacidade para tratar 3.000 toneladas de materia orgánica anuais, ás que habería que sumar 1.600 toneladas de material estructurante, é dicir, podas e restos de madeira.

Con esa materia prima espera producir case 1.500 toneladas de compost, que se destinará aos sectores da agricultura e xardinería como fertilizante natural.

A planta de Sogama estará alimentada por enerxías renovables e equipada tamén con novos e innovadores sistemas de depuración de augas e de aire, así como de control do nivel de ruído, garantindo con isto unha operativa respectuosa coa contorna e coa normativa medioambiental.

Aínda que a xestión dos residuos é unha competencia municipal, a Xunta de Galicia leva tempo apoiando os concellos para que cumpran coas obrigas legais establecidas na materia. E con ese obxectivo deseñouse desde a Consellería de Medio Ambiente unha rede de infraestruturas conformada por 17 instalacións: catro plantas de biorresiduos, unha en cada provincia –a coruñesa de Cerceda, que é a única xa en funcionamento; a pontevedresa de Vilanova de Arousa; a ourensá de Verín e esta de Cervo, na Mariña de Lugo–. Estas naves estarán apoiadas por trece plantas de transferencia que contarán cun punto de transvasamento independente para a fracción orgánica (Forsu).

Semana europea

A conmemoración da Semana Europea da Prevención de Residuos, que coincide entre o 19 e o 27 deste mes en todos os países da UE e que alcanza a súa edición número 14, eríxese na maior campaña de sensibilización ao redor da prevención e redución da xeración de residuos no continente, aglutinando a participación de distintos colectivos sociais co obxectivo de crear conciencia en torno ao consumo responsable, a menor produción de refugallos, a reutilización e a reciclaxe.

Campaña ► Sesión formativa en 40 colexios

Durante esta semana tamén se impartirán sesións formativas en preto de 40 centros escolares de primaria e secundaria dos 15 concellos da área de influencia da planta de Cervo. A pretensión é explicar a alumnos e docentes que implicará a chegada do contedor marrón ás súas localidades, como terán que realizar a selección dos residuos orgánicos, que deben e non deben depositar noel e que tratamento recibirán estes refugallos en Cervo.

Ademais, tendo en conta o alto poder de influencia que pequenos e mozos teñen nos seus fogares, garántese a transmisión de coñecementos e, sobre todo, a sensibilización ao redor da necesidade de colaborar activamente no sistema de recollida selectiva para incrementar a reciclaxe e, polo tanto, o aforro tanto ambiental como económico.

Os tres erres

Nesas sesións formativas tamén se incidirá no principio dos tres erres: a redución, a reutilización e a reciclaxe.