Máis de dúas mil persoas foron admitidas ás probas de acreditación da lingua galega (Celga) que coemzaron este sábado en Santiago e Ponferrada, dado o especial interese da promoción do uso do galego nos territorios galegofalantes do Bierzo e Sanabria.
Este sábado foi o turno dos que se examinaban no nivel catro, que superaron o millar de convocados. Segundo informou a Xunta, este domingo chega a quenda dos interesados en obter o segundo grao do Celga, que deberán presentarse na Escola Galega de Administración Pública na capital galega e na Escola Oficial de Idiomas de Ponferrada.
Para a vindeira fin de semana están programados os exames correspondentes aos niveis tres e un, que se celebrarán o sábado e o domingo, respectivamente.
O responsable da Secretaría Xeral de Política Lingüística - organismo encargado da organización dos exames-, Valentín García, visitou os centros de Santiago que acollen as probas e destacou "a importancia que a formación en lingua galega para adultos ten para o proceso de normalización lingüística".
Engadiu que as probas Celga permiten acreditar o nivel de galego a aquelas personas que non tiveron acceso durante a súa formación regulada a contidos en lingua galega, "ao tempo que potencian, adquiren e melloran as súas competencias no idioma propio", dixo.
O Celga é o certificado en lingua galega que expide a Secretaría Xeral de Política Lingüística da Xunta de Galicia e que acredita o coñecemento da lingua en cinco niveis.