Bescansa e Gómez-Reino enfrontarán os seus proxectos nun encontro o domingo

Os inscritos de Podemos Galicia escollen aos novos órganos de dirección nunhas primarias internas nas que está en xogo a Secretaría Xeral

Antón Gómez-Reino e Carolina Bescansa. EP
photo_camera Antón Gómez-Reino e Carolina Bescansa. EP

O Encontro Presencial da III Asemblea Cidadá de Podemos Galicia, que terá lugar no Palacio de Congresos e Exposicións de Santiago, servirá para que os dous aspirantes a liderar a formación, Carolina Bescansa e Antón Gómez-Reino, expoñan os seus respectivos proxectos ante a militancia.

Os inscritos de Podemos Galicia escollen aos novos órganos de dirección nunhas primarias internas nas que está en xogo a Secretaría Xeral do partido morado en Galicia, un proceso asembleario de eleccións primarias no que se pode votar desde este xoves até o día 24 ás 23.59 horas.

Así, o día 25 de outubro, coa sesión antifraude e o reconto, o proceso concluirá coa proclamación dos resultados. Este 18 de outubro abriuse o período de votación telemática, que abarcará até o 24 de outubro. Con todo, a votación dos Representantes dos Círculos no CCA realizarase de forma presencial no Encontro do día 21 de outubro, coas papeletas e nas urnas alí emprazadas.

O programa desa xornada é amplo, xa que ás 9.30 horas abrirase o Encontro Presencial da III Asemblea Cidadá de Podemos Galicia, coa entrada e as acreditacións, mentres que ás 10.30 horas comezará o propio Encontro coa benvida e a presentación.

A continuación, ás 11.00 horas e até as 11.30 horas, terá lugar a exposición das candidaturas a Representantes dos Círculos no CCA á que seguirá a votación dos Representantes dos Círculos no CCA, que estará aberta até o final do encontro, ás 14.30 horas.

Tras iso, terá lugar a exposición das candidaturas independentes ao CCA, así como para os debates dos documentos; organizativo, político e de feminismos. Para concluír a xornada, de 13.45 a 14.15 tanto Bescansa como Gómez-Reino poderán intervir nunha xornada de especial relevancia para a formación que o vindeiro xoves proclamará a quen será o seu líder durante os dous próximos anos.

Comentarios