Os aeroportos galegos creceron un 3,9% en cifra de pasaxeiros durante o primeiro mes do ano, até os 341.778, segundo os datos feitos públicos este martes por Aena. En concreto, no mes de xaneiro, polas tres terminais galegas pasaron 12.862 pasaxeiros máis que no mesmo período do ano anterior, o que supón un incremento do 3,9%.
O que máis pasaxeiros rexistrou foi Lavacolla, por onde pasaron 178.769 persoas, un 1% máis que hai un ano. Pola súa banda, A Coruña albergou 91.143 pasaxeiros, un 8,8% máis e Vigo creceu un 5,5%, até os 71.866. En canto á cifra de operacións, o aeroporto de Santiago operou 1.480 voos, un 0,9% máis que en xaneiro de 2018; Alvedro operou 1.225, un 7,3% máis; e Peinador 837, un 1,6% por encima do primeiro mes do ano anterior.
Con respecto á carga transportada, unicamente creceu en Vigo, onde o peso das mercadorías subiu un 7%. En Santiago, pola súa banda, caeu un 4,1% e na Coruña baixou un 1,3%.
