O Acasti Reformas faise co derbi na masculina mentres golean Al Metro e Ribeira, na feminina

O derbi entre o Acasti Reformas e o Meigallos marcou a xornada deportiva na categoría deixando ao equipo branco como vencedor do duelo por 7-3. Os locais foron superiores e máis rápidos como reflectiu o marcador, que se puxo en 2-0 nos primeiros 3 minutos. Aínda que os sarrios reaccionaron antes do descanso logrando empatar, o equipo branco amosou o seu dominio con tres goles máis.

O segundo tempo comezou con máis igualdade, de feito o Meigallos acurtou distancias, pero nos últimos minutos o equipo local ampliou o marcador ata o 7-3 do final.

O Ribeira segue liderando aos equipos lugueses desde o medio da táboa, onde esta fin de semana venceu ao Hércules por 1-5 para manter ferreamente a sétima praza.

O equipo lugués tardou en abrir a caixa dos goles, dous minutos antes do descanso e, á volta, o local empatou pero nos últimos catro minutos o Ribeira marcou os catro goles que avultaron o resultado.

O Casás tampouco puido sumar esta fin de semana os tres puntos, xa que caeu co 5 Coruña, por 3-4. Partido moi igualado no que se chegou ao empate 3-3. Aínda que a vitoria podería ter caído para calquera dos dous, foi o equipo coruñés o que se levou a vitoria por un gol marcado a 8 minutos do final.

Un problema co marcador provocou unha parada do xogo no medio do duelo, o que non axudou aos rapaces a centrarse na sesión.

Tampouco houbo sorte para o Begonte, que foi superado amplamente polo Stellae cunha goleada en contra de 9-1. Clara superioridade do rival, que no minuto 10 tiña xa un parcial de 4-0, que no intermedio foi de 8-0.

Consulta a clasificación aquí

HÉRCULES 1 - 5 RIBEIRA

ACASTI REFORMAS 7 - 3 MEIGALLOS

CASÁS 3 - 4 5 CORUÑA

STELLAE 9 - 1 BEGONTE

Liga Infantil Feminina

O Al Metro colocouse na terceira praza da táboa logo da goleada ante o Monterroso no derbi da xornada. Clara superioridade do equipo branco que tardou en romper, pero que chegou ao intermedio cun parcial de 1-5. Na segunda parte ampliou o marcador xusto no tramo final.

A outra goleada da sesión foi a do Ribeira co Parrulo, ao que venceu por 9-1. Foron moi superiores as locais que, desde os minutos iniciais sucederon os goles. Chegaron ao intermedio con 6 ao seu favor e o penúltimo tanto foi o do rival.

O Castro perdeu o seu lugar de privilexio logo de caer derrotado ante o Narón, equipo da súa zona, que venceu por 1-3. Moita igualdade para os dous equipos, que mantiveron o marcador a cero ata dez minutos antes do final. Foi o Castro o que abriu a conta pero o Narón reaccionou nos minutos finais para levarse a vitoria con tres goles seguidos.

Goleada en contra para o pechacancelas, o Burela, que foi superado polo Lago nun partido desigual no que o  local marcou dous goles de inicio. No intermedio ampliou a vantaxe a 5 e nos últimos minutos marcou o Burela e completou o 7-1 o Lago.

Consulta a clasificación aquí

RIBEIRA 9 - 1 PARRULO

CASTRO 1 - 3 NARÓN

LAGO 7 - 1 BURELA

MONTERROSO 1 - 10 AL METRO