O Friol descólgase da cabeza

O Guntín, que venceu ao Spórting Lucense, segue a encabezar a clasificación do grupo sur de Segunda Autonómica, cun punto de vantaxe sobre o Ferreira, que se desfixo do Río Sil, e catro sobre o Friol, que esta fin de semana volveu de baleiro do seu desprazamento a Monforte para enfrontarse ante o Lemos B. O equipo que adestra Javier Serén só logrou 4 puntos nos últimos 4 partidos e descólgase da loita polo ascenso directo.  

Dominio do Becerreá ante o Chantada B, aínda que o partido non se resolveu até a segunda parte. O primeiro tempo foi xogado todo no campo do Chantada B e os locais contaron con  5 claras ocasións de gol, que non materializaron, en parte grazas á boa actuación de Porto, o porteiro visitante, que fixo boas paradas. Tralo descanso, os xogadores que adestra Antón Méndez saíron decididos a resolver o encontro e nada máis arrincar a segunda parte, no minuto 46 marcou en xogada Cris. No 77, un tiro desde o bordo da área de José Antonio puña o 2-0. A piques de rematar o choque reducía distancias o equipo visitante de penalti transformado por Jordi, pero aínda habería tempo para o 3-1 definitivo, obra de Ylye xa no desconto. 

O equipo dos Ancares ten a enfermería chea pero segue mantendo o tipo, animado por unha afección que acude ao campo malia o frío, como sucedeu este sábado. O Becerreá ocupa postos de promoción de ascenso, empatado a puntos co Oural, que acumula unha mala xeira de resultados con tres empates e unha derrota nos últimos catro partidos. No desta fin de semana ante o Carballedo no Luis Pallín os de Sarria só sacaron un punto. Os visitantes, que suman tres empates consecutivos nos tres encontros disputados nesta segunda volta, o que lles permitiu abandonar o posto de pechacancelas que arrastraron toda a primeira volta, non se deron por vencidos até o pitido final, logrando o empate grazas a un gol no desconto de Darío, que foi expulsado tras marcar. 

Consulte a clasificación aquí

BROLLÓN 1 - 2 SAN LÁZARO

LEMOS B 4 - 0 FRIOL

BECERREÁ 3 - 1 CHANTADA B

MILAGROSA 2 - 1 PARADELA 

SAN ROQUE 1 - 0 CORGO  

RÍO SIL 0 - 3 FERREIRA  

OURAL 2 - 2 CARBALLEDO  

SP LUCENSE 0 - 4 GUNTÍN