O Guntín suma unha xornada máis

O Guntín segue líder destacado tras gañar onte a domicilio ao Paradela. O partido, xogado no Gandarón, chegou xa con 0-2 ao descanso, anotados por Daniel e José Francisco no ecuador da primeira parte. Ese resultado sería xa definitivo, xa que na segunda metade ningún dos dous conxuntos sería quen de anotar. Con esta nova vitoria, o  equipo que adestra Hugo Vázquez saca 9 puntos de vantaxe ao Friol, a falta de 12 puntos por disputar nas 4 xornadas que restan, nas que o Guntín se mide ao San Roque, ao Chantada B e ao Río Sil antes do enfrontamento directo co Friol na última xornada, un encontro ao que podería chegar xa co ascenso na man. 

O Friol, pola súa banda, impúxose pola mínima ao Ferreira no campo do Baliño grazas a un solitario tanto de Santiago a falta de 8 minutos para a finalización. Os de Pantón xogaron os últimos 10 minutos de partido cun menos pola expulsión de Édgar nada máis saltar ao terreo de xogo en substitución de Rafael. Malia a derrota desta fin de semana e a levar xa 6 partidos consecutivos sen gañar, o equipo que adestra José Antonio Vázquez continúa terceiro e é un firme candidato a xogar a promoción. 

Pecha os postos que dan dereito a xogar o play off polo ascenso o Oural, que se impuxo ao Lemos B no Luis Pallín grazas aos goles na segunda metade de Miguel e Diego, por partida dobre. 

Seguen pelexando por entrar tamén o Milagrosa e o Becerreá. No derbi da capital o Milagrosa impúxose ao San Roque con claridade. Con todo, o partido chegou con empate a cero ao descanso e foi na segunda metade cando se decantou en favor do equipo que adestra Manuel Couso grazas á actuación destacada de Joel, autor de tres tantos. 

Mentres, o Becerreá gañou a domicilio ao Río Sil. Un tanto de Smaily en propia meta, nada máis arrincar o partido, daba vantaxe aos dos Ancares, que sentenciaban o choque a falta dun cuarto de hora para o remate por medio de Kevin. 
 

Consulte a clasificación aquí

SAN ROQUE 0 - 4 MILAGROSA

RÍO SIL 0 - 2 BECERREÁ

OURAL 3 - 0 LEMOS B  

SP LUCENSE 2 - 1 BROLLÓN

CARBALLEDO 1 - 0 SAN LÁZARO   

FERREIRA 0 - 1 FRIOL

CORGO 1 - 2 CHANTADA B 

PARADELA 0 - 2 GUNTÍN