O Lugo B baixou ao Ceosport do podio despois de gañarlle a domicilio

Grupo 1

O Lugo B continúa á cabeza do grupo 1 con nove vitorias ás costas e esta quenda fíxolle baixar do podio ao Ceosport despois de gañarlles a domicilio. Na primeira metade os albivermellos deixaron o partido practicamente sentenciado e remataron cun 1-4 no taboleiro.  O resultado fixo que o Milagrosa se puxera no segundo posto da clasificación, xa que se levou os tres puntos cunha merecida vitoria sobre o Viveiro B. Os da capital gañáronlle na casa por 5-0.

Un posto subiu tamén o Burela, que se recuperou da derrota da semana pasada cun triunfo visitante contra o Castro. Os da mariña adiantáronse cun tanto de Jaime na primeira parte e remataron gañando o partido por 0-4.  No caso contrario, o Ribadeo baixou ao sexto posto despois de ser superado a domicilio polo Porto Burela, agora cuarto clasificado. Os do Porto marcaron primeiro, pero empatáronlles no inicio da segunda metade. Aínda así, os locais seguiron insistindo ata volver poñerse por diante e conseguiron a vitoria por 3-1.

O Lourenzá púxose sétimo despois de superar o Vilalbés B por 1-4, grazas a romper o empate na segunda metade. No caso do Foz, ocupa agora o noveno posto xa que foi derrotado polo Guitiriz. O duelo celebrado no Suso Cruz estivo moi igualado, pero despois de pasar dúas veces polo empate os locais conseguiron poñerse 4-3 e levarse os tres puntos. 

Enfrontáronse nesta xornada os dous últimos equipos da clasificación. A Comercial B conseguiu o primeiro triunfo do curso superando á Piringalla B por 2-1 grazas aos goles de Adrián e Diego na primeira parte.

Consulta a clasificación aquí 

CEOSPORT 1 - 4 LUGO B

GUITIRIZ 4 - 3 FOZ

MILAGROSA 5 - 0 VIVEIRO B

CASTRO 0 - 4 BURELA

PORTO BURELA 3 - 1 RIBADEO

VILALBÉS B 1 - 4 LOURENZÁ

 COMERCIAL B 2 - 1 A PIRINGALLA B

Grupo 2

No caso do grupo 2, os poucos cambios rexistrados na lista déronos as sorpresas do San Roque e o Corgo. Os primeiros subiron  ao oitavo posto grazas a gañarlle ao Sagrado Corazón a domicilio. Co marcador 3-3 un penalti sentenciou a vitoria para os visitantes por 3-4. Subiu tamén un posto o Corgo, que lle venceu ao Residencia B, terceiro clasificado. Despois dun primeiro gol dos locais, os da capital conseguiron empatar o partido na segunda metade, pero os do Corgo volveron poñerse por diante e remataron o duelo cun 3-2.

O Casás baixou ao décimo posto trala derrota contra os líderes, o Polvorín. Os amarelos seguen invictos despois de rematar o onceavo partido cun triunfo de 4-0. A Piringalla continúa tamén no segundo posto, goleou esta quenda á Comercial por 8-0. Outra avultada vitoria foi para o Becerreá, que non baixou a cabeza despois da última derrota, e varreu ao Antas por 7-1.

A Sarriana manténse no sétimo posto, pero cunha vitoria máis ao conseguir os tres puntos fronte ao Monterroso. Os brancos remontaron un gol en contra con goles de Raúl, Gonzalo e David. O resultado favoreceu ao Ceosport B, que puido subir un posto despois de superar ao Gimnástica Lucense por 2-4 no Rodríguez Lago. 

O único empate rexistrado nesta xornada asinárono o Palas e a Ferroviaria nos Chacotes. Os visitantes adiantáronse primeiro a través de Jonathan e aínda que os locais empataron no 23', foronse ao descanso cun 1-2. David conseguiu volver a poñer as táboas na marcador na segunda metade.

Consulta a clasificación aquí

A PIRINGALLA 8 - 0 COMERCIAL

POLVORÍN 4 - 0 CASÁS

CORGO 3 - 2 RESIDENCIA

BECERREÁ 7 - 1 ANTAS

MONTERROSO 1 - 3 SARRIANA

PALAS 2 - 2 FERROVIARIA

SAGRADO CORAZÓN 3 - 4 SAN ROQUE

GIMNÁSTICA 2 - 4 CEOSPORT B