A Primeira, ao ataque

Co Escairón á cabeza, esta fin de semana recolléronse máis goles do que está acostumada a competida Primeira. Os líderes non seguiron esa tónica e a vitoria foi pola mínima contra o Riotorto. O Atlético tivo o balón, pero non ocasións claras de gol, ata que se adiantou nun rexeite e puxo o 0-2 na segunda. O resultado non amedrentou ao Riotorto, que tivo varias claras ata que puxo o 1-2, pero non chegou a máis.

O Pol segue aos de Escairón no segundo posto e parece que volven amigarse co triunfo. Malia non facer unha boa saída contra o Pontenova, os de Germán Campos adiantáronse no 22’ e comezaron  a mandar co 0-2 ao descanso. Á volta, o Pol seguiu tendo o balón e Samuel fixo o terceiro. O Pontenova recortou distancias, pero dous goles máis dos polenses deixaron o resultado en 5-1. A mesma diferencia de goles que conseguiu o Outeiro contra o Pastoricense. No inicio os anfitrións da Fonte xogaron a un ritmo baixo e o partido foise 1-1 ao descanso. Na segunda, o cambio de actitude local foi clave para remontar o partido ante un rival que baixou os brazos.

Aínda foi máis avultado o marcador para o Chantada Atlético no choque contra o Lourenzá. Os locais viñan de pechar dous malos resultados, pero saíron con gañas e conseguiron irse ao intermedio por diante. Na segunda, saíron moi metidos e foron quen de deixar o marcador 6-1 ante un Lourenzá que acumula moitas baixas.

O duelo no que se contabilizaron máis goles foi no empate entre o Foz e o Chantada. Os mariñaos víronse cun gol de penalti a favor nos primeiros minutos, pero os visitantes empataron antes do descanso. No segundo tempo, o partido aumentou en ritmo e chegadas e o Foz desfixo o empate con dous goles. O Chantada non renunciaba e os focenses, ao non conseguir matar o duelo, perderon os tres puntos no desconto co 4-4 definitivo.

Malia que a vitoria do Castro sobre o Santaballés non foi a máis avultada, serviulle para subir ao terceiro posto do podio. Os de Víctor López tiveron un gol anulado na primeira parte e o duelo comezou á segunda sen goles. Nunha acción a balón parado, adiántanse os de Rafa Casanova, e aínda que os locais empatan en menos de dez minutos, o Castro levase o choque por 1-2. Baixou ao cuarto posto o Burela, que foi superado por un Xove Lago que lles cedeu o balón, pero aproveitou as súas opcións para poñerse 3-1.

O Monterroso, que venceu ao Antas,  rouboulle o posto ao Taboada, malia que estes  tamén se levaron os tres puntos. Os de San Cristóbal foron mellores no derbi e deixaron o marcador 2-0. Pola parte do Taboada, romperon o partido contra o San Ciprián cun penalti a favor no inicio e remataron gañando 2-1.

Consulta a clasificación aquí

SANTABALLÉS 1 - 2 CASTRO

MONTERROSO 2 - 0 ANTAS

CHANTADA ATL 6 - 1 LOURENZÁ

OUTEIRO DE REI 5 - 1 PASTORICENSE

POL 5 - 1 PONTENOVA

 FOZ 4 - 4 CHANTADA

XOVE LAGO 3 - 1 BURELA 

RIOTORTO 1 - 2 ATLÉTICO ESCAIRÓN

 SAN CIPRIÁN 1 - 2 TABOADA