O Chantada subiu ao terceiro posto tras cinco vitorias consecutivas

Trece xornadas na Primeira e ninguén renuncia aos seus obxectivos desta tempada. O Pol segue na cabeza unha fin de semana máis e faino con  32 puntos tras superar ao Foz nun intenso partido. Os locais saíron apertando aos da Mariña e conseguiron o primeiro tanto. Repregáronse e conseguiron saídas perigosas á contra, co que conseguiron o segundo tanto. Nos últimos minutos do partido, nunha falta frontal puxeron o 3-0 definitivo. Segue enganchado tamén o Escairón, con 29 puntos. Os derradeiros tres saíron do partido contra o Santaballés, choque con ritmo que rematou 1-2. O primeiro tanto foi para o Atlético no 11’ e conseguiron o 0-2 nunha segunda parte máis trabada. Os de Vilalba pelexaron ata o final e fixeron o 1-2, pero sen conseguir máis.

O Chantada subiu ao terceiro posto cun triunfo ante o Antas e grazas á derrota do Castro por parte do Burela. O duelo celebrado no Castro Seoane estivo dominado polos visitantes de principio a fin e no primeiro minuto o Chantada fixo o primeiro e chegaron dous goles máis antes do descanso. No caso do celebrado no Arturo Pereiro, viviron un primeiro tempo igualado, co balón dominado polo equipo local, pero sen efectividade nas dúas áreas. Despois do intermedio aumentou o ritmo e o Castro fixo o 1-0. O Burela lanzouse a polo partido ata rematar remontando a falla de poucos minutos.

No quinto posto mantense o Outeiro de Rei, que rexurdiu despois de dúas derrotas gañándolle ao Xove Lago nun choque con moito xogo directo. Tralo paso polos vestiarios adiantáronse os de Aarón Sánchez, pero os mariñaos empataron nunha boa transición. Nos últimos minutos o Outeiro volveu ter protagonismo ata conseguir levarse o partido co segundo tanto. Tamén se mantén no mesmo posto o Chantada Atlético, que volveu amosar o seu potencial ofensivo contra o Riotorto e levouse merecidamente os tres puntos cun 5-0 no electrónico.

Cambiando á metade baixa da táboa, o Lourenzá reencontrouse cos tres puntos despois de cinco xornadas, ao superar o enfrontamento contra o Pontenova. Despois de 90’ minutos onde o esférico non quixo entrar, Yago fixo o 1-0 no derradeiro suspiro. Por 2-0 foi a vitoria do Monterroso sobre o San Ciprián, un partido competido entre dous rivais na táboa que comezou con escasas ocasións. No segundo tempo abriuse máis o partido con xogadas polas bandas e así chegaron os goles de San Cristóbal para conseguir o triunfo. En canto ao Taboada, goleou a  un Pastoricense que quixo revivir tralo descanso, pero rematou perdendo 6-0.

Consulta a clasificación aquí

POL 3 - 0 FOZ

OUTEIRO DE REI 2 - 1 XOVE LAGO

CHANTADA ATL 5 - 0 RIOTORTO

MONTERROSO 2 - 0 SAN CIPRIÁN

SANTABALLÉS 1 - 2 ATLÉTICO ESCAIRÓN

CASTRO 1 - 2 BURELA

ANTAS 0 - 3 CHANTADA

LOURENZÁ 1 - 0 PONTENOVA

TABOADA 6 - 0 PASTORICENSE