Diferentes obxectivos, pero as mesmas gañas para acadalos

A Primeira despediu marzo co Chantada subindo de novo ao podio. O cadro de Adrián Méndez, conseguiu impoñerse na Mina ao Pontenova, ao que se lle complica a permanencia. Comezaron tendo moitas ocasións, pero abriron o marcador os locais nun man a man. Antes do descanso Michi fixo o 1-1 e no segundo tempo o partido trabóuselles, pero Kadete transformou un penalti para levarse o partido cun 1-2.

Baixou ao cuarto posto o Pol, que caeu a domicilio contra o Chantada Atlético. Os locais empezaron mellor e puideron adiantarse nun penalti. Ao pouco abriron o marcador nun córner e fixeron o segundo aproveitando un erro defensivo. Na segunda metade os visitantes melloraron, pero encontráronse cos paus e un bo porteiro rival.

Seguen arriba o Escairón e o Castro, que conseguiron sumar tres puntos máis. No caso do Atlético tocoulle viaxar para enfrontarse ao Lourenzá e foise ao descanso cun 0-1. Na segunda, Javier fixo o segundo e tiveron varias para sentenciar. O Lourenzá achegouse cun tanto de Yago e quixeron empatar, pero o 1-2 foi o resultado. No caso do Castro, tocoulle remontar no Arturo Pereiro contra o Riotorto. Pape adiantou aos visitantes, pero en canto os vermellos se asentaron no verde tomaron o control, chegando ao descanso por riba. O Riotorto non conseguiu ofrecer moito máis perigo e o marcador pechouse cun 3-1.

O Outeiro de Rei mantén o quinto posto, pero volveu ser derrotado esta fin de semana contra o Taboada. Comezaron tendo o balón os visitantes e  nun centro meteu en propia meta o cadro da Medela. Tralo descanso o Taboada buscou verticalidade e conseguiu o empate a través de Adrián. No tempo de desconto, un penalti protestado que deixou ao Outeiro con 10 deulles a vitoria aos locais.

Baixou ao número sete o Foz, que foi superado pola mínima en Cerdeiriños. Nun partido de fútbol directo o Monterroso conseguiu levarse as disputas e, nunha segunda xogada, Crespo aproveitou un balón solto na área para facer o 1-0. Despois do intermedio, ambos os equipos tiveron opcións, pero non foron quen de marcar. A derrota deixa aos da Mariña a tres puntos do Burela, que empatou sen goles contra o Pastoricense. Os verdes tiveron o protagonismo ante un rival que non conseguía pasar do medio do campo. Aínda así, o Burela non conseguiu materializar as súas ocasións e repartiron os puntos.

O Santaballés pasoulle por riba ao Xove Lago despois de gañarlles na Liga. Os locais levaron o peso do partido ante un rival que se presentou con baixas e foron quen de rematar 4-1. Por abaixo, o Antas conseguiu gañarlle ao San Ciprián, pero segue en perigo. O duelo comezou igualado e con seriedade defensiva, pero na segunda os visitantes baixaron o ritmo e o Antas o aproveitou.

Consulta a clasificación aquí

TABOADA 2 - 1 OUTEIRO DE REI

CHANTADA ATL 2 - 0 POL

 MONTERROSO 1 - 0 FOZ

 SANTABALLÉS 4 - 1 XOVE LAGO

ANTAS 2 - 0 SAN CIPRIÁN

 LOURENZÁ 1 - 2 ATLÉTICO ESCAIRÓN

PASTORICENSE 0 - 0 BURELA 

 PONTENOVA 1 - 2 CHANTADA

CASTRO 3 - 1 RIOTORTO