Dúas vitorias locais, un empate na Mariña e dúas derrotas en duelos igualados

A Galega xuvenil celebrou esta fin de semana a xornada número 12 rematando con variedade de resultados para os lucenses. O Viveiro segue sendo o mellor conxunto da provincia na clasificación. Os da Mariña empataron o encontro contra o Estrada no Marcos Gómez. O equipo local saíu ben ao verde e tivo dúas chegadas claras antes de marcar o primeiro gol nun man a man de Ferro a pase de Adri. Co 1-0, o Viveiro comezou a cometer erros defensivos que os levaron a irse ao descanso por debaixo no marcador. No segundo tempo, non conseguiron impoñer o seu xogo e concederon o 1-3 nun erro clamoroso. Os de Diego Fernández conseguiron poñerse 2-3 nun penalti, pero aos poucos minutos recibiron o 2-4. Co partido totalmente roto, os celestes xogaron un fútbol máis directo e lograron empatar nos minutos finais.

As vitorias da fin de semana foron para o Vilalbés e para o Residencia, que tamén xogaron na casa. Os chairegos conseguiron vencer ao Val por 2-0. O duelo comezou con dominio local, pero ao equipo lucense custáballe chegar á portería rival xa que os visitantes estiveron ben plantados en defensa. No primeiro tempo, o Vilalbés tivo unha ocasión de Migui e un gol anulado de Sergio, mentres que o Val non inquietou. Na segunda, foron quen de axustarse e aumentar o número de chegadas ata que no minuto 80 Alfredo rematou un centro de Migui para poñer o 1-0. Despois do gol, o Rácing quedou cun xogador menos, pero conseguiu asegurar a vitoria co 2-0 a través de Toni.

No caso do Residencia, levouse os tres puntos fronte ao Lalín. A primeira metade do duelo estivo moi disputada, ambos os dous equipos marcaron cedo e a partir de aí o partido trabouse e non houbo dominador claro. Tralo intermedio subiu a temperatura do choque e comezaron a repartirse tarxetas para ámbolos bandos. Os lucenses empezaron a dominar ao Lalín a través de transicións rápidas, o que lles deu pe a asinar tres goles e conseguir unha vitoria merecida. 

En canto ao Ribadeo e ao Milagrosa, aos dous equipos se lle escaparon os tres puntos. Os da Mariña perderon a domicilio contra o Dumbría por 3-2. Comezaron o choque perdendo, pero  remontaron grazas aos tantos de Ayoub e Óscar antes do descanso. Na segunda parte, os locais empataron o partido e o Ribadeo intentouno malia que o esférico non quixo entrar e tiveron que soportar a falta de compañeirismo dos rivais. Ao final, nos derradeiros intres do partido o Dumbría marcou o terceiro que lles deu o triunfo.

Pola parte do Milagrosa, viviu unha historia parecida no Luís Gorgoso contra o Olímpico. Despois de remontar un gol en contra a través de Juan e David, desvaneceuse o triunfo no segundo tempo co 2-3 dos visitantes.

Consulta a clasificación aquí 

VILALBÉS 2 - 0 O VAL

VIVEIRO 4 - 4 ESTRADA 

RESIDENCIA 4 - 1 LALÍN

DUMBRÍA 3 - 2 RIBADEO

MILAGROSA 2 - 3 OLÍMPICO