O Casás conseguiu empatárlle á Piringalla e frear a súa xeira de vitorias

Despois de seis xornadas chegou o final da primeira volta e o Casás conseguiu frear a xeira de vitorias da Piringalla, posto que lle empatou na recta final do seu duelo. Os líderes comezaron co partido en contra no Rodríguez Lago, pois Jorge asinou un tanto para os visitantes no minuto 11. Porén, Cristóbal conseguiu remontar o partido antes do descanso con dous goles. Na segunda metade, a vitoria parecía asegurada, pero Tulio puxo o 2-2 que fixo que os dous equipos repartiran os puntos. 

O Foz conseguiu romper cos malos resultados das últimas xornadas, levándose os únicos tres puntos da fin de semana. Os da Mariña ganáronlle a domicilio ao Residencia B por 0-2 con dous goles na segunda metade. O primeiro chegou no 51' a través de Pablo e mataron o partido no 90' co segundo, asinado por José María. O resultado axudou a que o Foz subira ao segundo posto, xa que a Sarriana e o Becerreá adiaron o seu encontro para decembro.

O Polvorín, terceiro, e o Castro, último clasificado, remataron en táboas o seu choque celebrado en Lugo. Os visitantes abriron cedo o marcador cun tanto de David e no 25' chegou Sergio para poñer o 1-1 no marcador. Na segunda metade, o duelo volveuse máis agresivo, pero o resultado mantívose ata a bucina final. 

Consulta a clasificación aquí 

A PIRINGALLA 2 - 2 CASÁS

POLVORÍN 1 - 1 CASTRO

RESIDENCIA 0 - 2 FOZ