O empresario Manuel Jove segue a diversificar a súa carteira despois de vender a construtora Fadesa. Agora entra de cheo no mundo do ouro negro coa adquisición do 40% de Vetra Enerxia S.L., compañía adicada a explotación de campos petrolíferos en todo o mundo, especialmente en Latinoamérica. Jove terá poder sobre tres dos sete representantes no consello de administración.
Vetra iniciou a súa actividade en 2003 baixo a dirección de Humberto Calderón Berti ex presidente da OPEP e de Petróleos de Venezuela (PDVSA). Ten presencia en México, Arxentina, Trinidad, Colombia e Perú.
Liquidez para novos proxectos
Jove centra moitas miradas no mundo empresarial e financeiro dende que hai uns meses pechou a venda de Fadesa a Fernando Martín, propietario de Martinsa. O éxito da operación sempre estivo asegurado, xa que a familia fundadora, capitaneada por Manuel Jove Capelán, comprometeuse a venderlle a súa participación. O fundador de Fadesa embolsouse daquela 2.209 millóns de euros que lle deron liquidez para investir no parqué. A iso hai que sumarlle os 550 millóns de euros pola venda en 2006 do 4,5% do capital que mantiña en Unión Fenosa ao grupo construtor ACS.
A prensa publicou a súa interese por entrar no capital do BBVA, Iberia, Iberdrola, Endesa e Repsol, malia que nada disto se concretou, ó contrario que á súa entrada no grupo téxtil Caramelo, onde se fixo co 37% hai tan só unhas semanas.
Novo instrumento inversor
Jove tamén se implicou xunto ás entidades financeiras Caixa Galicia, Caixa Nova e Banco Pastor nunha sociedade de investimento a través da Fundación Galega para a Sociedade do Coñecemento.. Aberto ós empresarios galegos, conta cun fondo inicial de 100 millóns de euros nos que a Xunta participa cun 5% do capital.
Manuel Jove Capelán rexistrou hai só uns días na CNMV o seu novo instrumento inversor, Arnela Capital. Terá domicilio social na Coruña. Aínda conta con suficiente liquidez para ir incrementando os seus investimentos. Haberá novas noticias, seguramente, nos próximos meses. Continuará.
