O Keeper recupera a cuarta praza da táboa tras vencer ao Vigo e o Ribeira fixo fronte ao líder

División de Honra Xuvenil

O Keeper Galicia recuperou a cuarta praza da clasificación esta fin de semana tras vencer ao Vigo 2015, colista do grupo, por 2-6 a domicilio. Os brancos controlaron totalmente a primeira parte, onde o rival só dispoñía de ocasións nas transicións. Ao descanso, o equipo xa estaba 0-3 pero a pausa sentou ben aos locais que comezaron mellor e a piques estiveron os de Lugo de perder a vantaxe. 

Aos catro minutos de xogo recuperaron o control e meteron o cuarto. O local apertou e conseguiu marcar en dúas ocasións pero non se perdeu a vantaxe de catro goles coa que rematou o duelo.

Consulta aquí a clasificación

O Ribeira tivo como rival esta fin de semana ao líder, o Valladolid, ao que recibiu no Municipal de Lugo. Xogaron ben os locais, que están a ter unha gran evolución, como amosa o feito de que varios xogadores están nutrindo xa ao equipo sénior.

O Valladolid fixo valer unha espectacular pegada para levarse a vitoria xa que o xogo estivo moi igualado. O Ribeira fallou moitas ocasións pero foron mellores no cómputo de xogo e a nivel táctico.

A primeira parte estivo moi igualada pero o marcador pechouse co 1-3 debido aos múltiples fallos dos locais. A segunda parte comezou igual pero cando entrou o cuarto gol optouse polo xogo de 5, o que trouxo dous tantos máis en contra. Con esta situación o equipo repúxose e incluso lograron que o rival non sacase renda dunha inferioridade para lograr meter dous goles máis. Aínda así a distancia acumulada era moita para poder superala.

Satisfacción no banco ribeirao ante a melloría dos xogadores, que intentarán saír de novo da zona de descenso e que mellorarán en competitividade nesta segunda volta.

VIGO 2 - 6 KEEPER GALICIA

RIBEIRA 3 - 8 VALLADOLID

               Resultados xornada 16

           Próxima xornada

División de Honra Cadete

O Burela segue acaparando o liderado da División de Honra cadete tras vencer con rotundidade ao Bueu, un dos equipos de abaixo, esta fin de semana. 7-1 foi o resultado co que os laranxas castigaron ao debutante.

Malia o resultado avultado, tardou o Burela en centrarse no partido marcando o primeiro no minuto 12. Non lle deixou coller vantaxe o rival, que empatou aos dous minutos e non se poñería de novo por diante o local ata que faltaba un minuto para o descanso.

Na segunda, tivo que loitar moito polo terceiro gol pero nos últimos dez minutos foi cando avultou o resultado ata o 7-1. Varias tarxetas para os locais, que se levaron 1 para Cristian Fustes e dúas para Mario Pillado, que estaba como segundo. Tamén para os xogadores Iago e Raúl.

Consulta aquí a clasificación

O Ribeira tamén colleitou unha vitoria esta fin de semana, ante o 5 Coruña, co obxectivo de recuperar o liderado do grupo, que lle arrebatou o Burela xusto antes do Nadal.

Foi un duelo moi igualado, no que o marcador, aínda que se abriu en contra para o Ribeira, logo foi sempre por diante pero cuns resultados axustados que remataron no tramo final, cando aproveitaron un par de contras para abrir fenda ata o 3-6 do final.

O Ribeira está a ter unha complicada tempada xa que ás baixas de Alexandre e Ángel, ambas de larga duración, súmase ahora a de Aimar.

Finalmente, o Keeper Galicia, que se mantén na parte morna da táboa caeu na casa contra o Parrulo A. O equipo lugués entrou con forza ao parqué e adiantouse cedo cun bonito gol de Javi García, que en realidade acabou sendo un espexismo xa que o visitante acabou dándolle a volta ao marcador ata o 1-2. Os brancos reaccionaron e empezaron a chegar as ocasións pero tras unha mala saída de presión o Parrulo faise co balón e logra o 1-3.

Na segunda, o Keeper saíu de novo con ganas pero as ocasións non atopan un final feliz así que o Parrulo, ben posicionado e coas ideas claras, seguiu abrindo fenda nas transicións e en ataques posicionais. O partido se foi no minuto 40, cando meten o sexto. Aínda que recurtaron distancias xa non houbo máis opcións.

KEEPER GALICIA 3 - 7 PARRULO A

BURELA 7 - 1 BUEU

5 CORUÑA 3 - 6 RIBEIRA

                Resultados xornada 16

Próxima xornada