O PP denuncia que o Pazo dos Deportes leva sen auga dende mediados do pasado mes de marzo e insta ao goberno provincial a contratar canto antes as obras de reparación.
Segundo o deputado provincial popular Óscar Poy, as instalacións levan sen auga desde mediados de marzo, debido a unha rotura na rede de subministro, situada entre o Pazo e o seu anexo.
Os populares sinalan nunha nota de prensa que, deste xeito, os deportistas vense na obriga de ducharse nas súas casas despois de adestrar nas instalacións, así como é preciso recorrer a caldeiros de auga para encher as cisternas dos inodoros.
Así, Poy insta ao goberno provincial a adoptar "de inmediato" as medidas precisas para reparar "a fuga" e normalizar o subministro de auga a esta instalación deportiva.