lunes. 09.12.2019 |
El tiempo
lunes. 09.12.2019
El tiempo

A tropa meirega arrasa nos Mestre Mateo con 13 premios para 'Dhogs'

Todo o equipo de 'Dhogs'. ÓSCAR CORRAL
Todo o equipo de 'Dhogs'. ÓSCAR CORRAL

A ópera prima de Andrés Goteira levou estatuíñas en todas as categorías artísticas ás que optaba e convértese no filme máis votado da historia dos galardóns do audiovisual galego

Os esforzos artellados durante anos por unha cuadrilla de millennials de Meira víronse este sábado recompensados na forma das trece cacholas do Mestre Mateo que o equipo recolleu ao longo da gala do audiovisual galego grazas a Dhogs, a ópera prima de Andrés Goteira, un mozo que vende electrodomésticos para gañar a vida e que soña películas.

Dhogs acaparou trece premios Mestre Mateo na gran gala que se celebrou este sábado no Palacio de la Ópera da Coruña e converteuse, así, na produción máis votada da historia dos premios da Academia Galega do Audiovisual. O filme de Andrés Goteira, coproducido por Gaitafilmes e Pixel Films, conquistou os galardóns á mellor longametraxe e mellor guión, dirección e montaxe para o meirego, que comparte a última con Juan Galiñanes. As e os académicos recoñeceron tamén a interpretación protagonista da actriz luguesa Melania Cruz e de Iván Marcos e a interpretación de reparto de María Costas e de Antonio Durán 'Morris', que competía nesta categoría cos seus compañeiros de Dhogs Carlos Blanco e Miguel de Lira.

Cando subiu ao recoller o galardón á mellor montaxe, Andrés Goteira asegurou que foi "moi bonito" chegar de Edimburgo a Meira, "un "pueblín" de 1.500 habitantes e 1.700 vacas, que dicía Xosé da Flor [en lembranza do recentemente falecido Xosé Salgado], e ver que podes facer unha película". Na súa intervención tivo palabras de agradecemento para os seus compañeiros de Gaitafilmes e para a Agadic, a Deputación de Lugo, o Concello de Meira e as empresas que apoiaron a iniciativa, así como ao Festival de Ourense (OUFF), "os primeiros que nos dixeron que Dhogs era unha película e non un experimento".

Ademais do pleno nas categorías interpretativas, Dhogs gañou tamén os galardóns á mellor dirección de produción para o tamén meirego Suso López, dirección de fotografía para Lucía Catoira Pan, música orixinal para o zanfonista asentado en Castro de Rei Germán Díaz, dirección de arte para Noelia Vilaboa e son para David Machado e Javier Pato.

Outra ópera prima, A batalla descoñecida, neste caso dirixida por unha muller, Paula Cons, gañou o premio ao mellor documental. Moi novos tamén son os Porco Bravú, que gañaron o seu terceiro premio á mellor serie web con Peter Brandon. Matria, do realizador con orixes en San Cibrao Álvaro Gago, conquistou o de mellor curtametraxe e The Neverending Wall, o de mellor curtametraxe de animación. Conserveiras do noso fixo o propio co de mellor anuncio e Troubled Times, para a banda estadounidense Green Day, de Manu Viqueira, co premio ao mellor videoclip.

Os premios televisivos recoñeceron a Dani Viqueira Carballal e Veru Rodríguez Rodríguez pola realización de Tesouros no faiado, mentres que Arantxa Domínguez gañou o premio ao mellor vestiario polo seu traballo en Juana de Vega, Vizcondesa do Arado e Chicha Blanco e Vicen Betí o de mellor maquillaxe e perruquería en Os fillos do sol.

Serramoura acadou por cuarto ano consecutivo o premio á mellor serie, mentres que A revista fin de semana gañou o de mellor programa de televisión e Nieves Rodríguez, o de mellor comunicadora polo seu traballo no Vaia Troula!. Esta última, presidenta da Asociación de Actores e Actrices de Galicia, empregou unha das quendas de palabra máis aplaudidas da noite ao citar a Castelao para reivindicar a defensa da lingua no audiovisual do país: "Se aínda somos galegos, é por obra e graza do idioma". E rematou: "Falade, meniñas, falade galego diante e detrás das cámaras!".

Tamén Marga Pazos, presentadora de informativos da TVG que entregou un dos galardóns, recibiu a adhesión do respectable cando enfatizou: "Traballamos para os gobernados, non para os gobernantes".

Nunha gala que tivo a Yolanda Muíños como mestra de cerimonias e na que as mulleres foron as encargadas de entregar os galardóns -mesmo baixo a proposta cancelo #TodoConachas-, o presidente da Academia Galega do Audiovisual, Carlos Ares, non esquivou temas de actualidade como a censura de Fariña ou a polémica xurdida arredor do pregón de Entroido de Compostela.

Tampouco, a visibilidade das mulleres no sector e a denuncia dos comportamentos sexistas, ao abeiro de movementos internacionais como #MeToo e #Time'sUp. Ao igual ca na gala dos Goya, abanos vermellos reclamaron #MáisMulleres na cerimonia de entrega dos Mestre Mateo, que lle concedeu o premio de honra Fernando Rey á actriz María Bouzas.

A tropa meirega arrasa nos Mestre Mateo con 13 premios para 'Dhogs'
Comentarios