Rodríguez Pazos recordou a Manuel María "como un pozo de sabedoría"

Un momento do recital poético na honra a Manuel María na carballeira de Santa Isabel. AIDA SOENGAS

A exrepresentante pública lucense recibiu a navalla do escritor nun acto que reuniu ducias de persoas de toda Galicia en Outeiro de Rei

"Manuel María era un pozo de sabedoría. Unha gran persoa que sempre loitou pola nosa cultura, pola nosa lingua e polo noso país. Por iso estamos aquí, un ano máis, para recordalo, aínda que nunca esmorecerá da nosa memoria", salientou emocionada Branca Rodríguez Pazos ao recibir este sábado a navalla do escritor en Outeiro de Rei nun multitudinario acto, enmarcado na chamada Memoria da Chaira Enteira, e celebrado con motivo do cabodano do escritor.

A xornada, organizada polas asociación Xermolos e Irmandade Manuel María, arrancou ao mediodía cun xantar de irmandade no restaurante local Río Ladra. Preto dun cento de persoas desfrutaron deste ágape, que deu paso a un recital de poesía en Penas de Rodas.

O momento máis emotivo do día foi a procesión cara ao cemiterio de Outeiro de Rei para depositar unha rosa na tumba do autor. Os asistentes, chegados de todas as partes da xeografía galega, desfiaron á tromba de choiva que pretendía empañar o momento e camiñaron firmes cara ao camposanto acompañados dun recital de versos do escritor e do himno da Irmandade de fondo.

A continuación, celebrouse o acto de entrega das navallas de Manuel María aos dous homenaxeados deste ano na carballeira de Santa Isabel. Marica Campo, David Otero e Mero Iglesias foron os encargados de presentar os recoñecementos para ambos. De Branca Rodríguez Pazos salientaron que o seu labor na Administración galega foi fundamental para o nomeamento da Muralla como Patrimonio da Humanidade e enxalzaron a súa "atención ás necesidades veciñais".

De Moncho Valcarce destacaron que fixo "sempre forza co pobo, desde o rural, para reclamar a dignidade da terra en propiedade para que sexa fogar, semente e poida garantir porvir".

A homenaxe concluíu cun xantar de confraternidade entre todos os asistentes. Os organizadores destacaron a grande afluencia de público, "que se multiplicou no momento da ofrenda", e salientaron que seguirán traballando para manter vivo o legado do poeta.

Esta distinción, ademais de á extenente de alcalde do Concello de Lugo e exdelegada da Vicepresidencia da Xunta, tamén foi concedida a título póstumo a Moncho Valcarce, o cura das Encrobas. Membros da Irmandade Moncho foron os encargados de recoller este galardón.