Oliver Laxe busca actores que non sexan profesionais para a súa nova película, Aquilo que arde, un filme que ten como trasfondo os incedios forestais. O director coruñés programou un cásting para este sábado na casa consistorial de Navia de Suarna que durará todo o día.
Laxe xa traballou con actores sen experiencia en interpretación en Todos vós sodes capitáns, con nenos acollidos nun centro de Tánxer. Desta volta procura mulleres de máis de 60 anos e homes 40 anos en diante. Aínda así, a convocatoria sinala que serán benvidos nenos, adolescentes, e xente maior a unhas probas de selección que se farán no salón de plenos do Concello de Navia de 10.00 a 14.00 e de 16.00 a 21.00 horas.
A localización da nova película será na casa dos avós maternos, nun lugar do propio municipio de Navia de Suarna e próximo a Cervantes, ao que conducirá a un grupo de alumnos do Máster en Documental de Creación da Universitat Pompeu Fabra, de Barcelona no próximo verán.
Aquilo que arde rodarase en galego, coescrita por Laxe e Santiago Fillol, ambos os dous autores tamén do guión de Mimosas. A fotografía, nesta ocasión, correrá a cargo de Diego Romero, director de fotografía das longametraxes de Roberto Minervini (Stop the Pounding Heart e The Other Side), así como de títulos recentes como Sicixia, de Ignacio Vilar, ou Migas de pan, de Manane Rodríguez.
A película trata os incendios, pero non quere concienciar, senón tratar de comprender os que lles prenden lume aos montes
O realizador explica o argumento coa sinxeleza de que trata sobre un home que sae da casa e volve, pero esa pequena trama vaille servir para contar o seu interese «polo pirómano que habita en nós».
«Todos temos unha relación estética co lume, todos temos ante el unha relación de fascinación e medo. Unha paixón e hipnose excesiva que pode chegar a ser un estado de embriaguez e de transo. Un dos meus obxectivos á hora de filmar o lume será o de espertar esta pulsión de atracción do espectador ante o lume», asegura o director premiado en Cannes.
Lonxe do «paternalismo» dun proxecto pensado para concienciar, a súa intención pasan por quitar o seu lado «máis provocador», cun achegamento «bastante metafísico e plástico» ao lume. Con Aquilo que arde pretende «redimir» a un personaxe «vilipendiado e demonizado».
