O deputado do BNG Bieito Lobeira preguntou no Parlamento Galego pola "exclusión" da lingua galega nas campañas publicitarias da marca 'Galicia Calidade'. Segundo entende o nacionalista, "a supresión do galego é unha demostración da desafección polo propio e de anulación do noso idioma".
As dúas últimas campañas, Cos ollos pechados (2007) e De haber unha aperta [un bico] Galicia Calidade, sería este (2008), foron presentadas en galego, ao igual que o vídeo de presentación da marca gravado no 2009.
Desta volta, Lobeira denuncia que "toda Galicia está inzada de paneis de grandes dimensións co lema La mejor calidad gallega controlada. O montante invertido nesta publicidade ascende a medio millón de euros, dixo o nacionalista, quen considerou que "non existen" motivos comerciais para a exclusión do galego.
Citando as conclusións de varios estudos de mercado, asegurou que o uso desta lingua na promoción e etiquetaxe dos produtos "é percibido como sinónimo de cercanía e de confianza e adquire maior credibilidade no mercado".
