Domingo. 23.09.2018 |
El tiempo
Domingo. 23.09.2018
El tiempo

Manuel María, "pedra angular" da música galega contemporánea

Participantes na segunda xornada do Simposio Manuel María da Coruña
Participantes na segunda xornada do Simposio Manuel María da Coruña
Un simposio do autor na Coruña seguiu coas achegas á narrativa, historia e teatro

A narrativa, o xornalismo cultural, a historia no teatro, a súa condición de "pedra angular na creación da música galega contemporánea", as achegas á construción dunha educación literaria en galego e a importancia da lingua na vida, na obra e no pensamento de Manuel María foron parte dos temas abordados onte na segunda xornada do simposio dedicado ao protagonista do Día das Letras Galegas 2016.

O encontro rematará este xoves con máis relatorios, unha mesa de debate sobre poética e poesía e a proxección do documental ‘Eu son fala e terra desta miña terra’, da académica Margarita Ledo, ás 19.30 horas. Todas as actividades se desenvolven na sede da RAG (rúa Tabernas, 11, A Coruña) e son de entrada libre.

Camilo Gómez Torres, autor da primeira tese sobre Manuel María, abriu a segunda xornada cunha conferencia sobre a biografía e a creación do homenaxeado. Deseguido o secretario da RAG, Henrique Monteagudo, moderou unha mesa de debate sobre a narrativa do escritor chairego con Mercedes Queixas, Carmen Fernández Pérez Sanjulián e Xosé Ramón Freixeiro Mato.

Queixas recordou que a obra narrativa de Manuel María abrangue máis de sesenta relatos "que nacen e medran, en paralelo, á expresión escrita máis popular e recoñecida, a poética, mais tamén á dramatúrxica e ensaística".

Fernández Pérez Sanjulián centrou a súa intervención nas colaboracións do autor no semanario A Nosa Terra, onde co pseudónimo Manuel Hortas Vilanova publicou desde 1977 case trescentas entregas na sección ‘Andando a terra’ que constitúen "un magnífico exemplo do xornalismo cultural da segunda metade do século XX". "Estas achegas xornalísticas son un microcosmos onde se pode observar con claridade a liña ideolóxica que, a modo de columna vertebral, organiza o pensamento do autor, e que non é outro que a afirmación de Galiza como nación. Este discurso desenvólveo ao longo de toda a súa produción literaria", expresou a profesora da Universidade da Coruña.

O tamén profesor da Universidade da Coruña Xosé Ramón Freixeiro Mato foi o encargado de analizar a lingua na vida, na obra e no pensamento do escritor, que non se limitou a dar testemuño persoal de coherencia e compromiso no uso constante do galego. Tamén se implicou na causa da súa dignificación e normalización social e defendeu, "con certeza", o concepto de normalización lingüística fronte ao de bilingüismo. "E por ela loitou tanto desde a súa acción sociopolítica militante como desde a súa obra poética, ensaística, narrativa ou teatral, pois a reivindicación e defensa do idioma propio é un tema constante en toda a súa produción. Descualificou, por consecuencia, o bilingüismo como solución alternativa á normalización e criticou aquelas persoas que desertan do idioma propio ou que mostran deslealdade cara a el", concluíu.

Manuel María, "pedra angular" da música galega contemporánea
Comentarios