O auditorio municipal Gustavo Freire acolle este domingo, ás 18.30 horas, a presentación en Lugo do espectáculo infantil Danza da choiva, de Elefante Elegante, como parte da programación da Rede Galega de Teatros e Auditorios. O escenario lucense é un dos espazos asociados a este circuíto escénico e musical da Xunta, dentro do que este primeiro semestre do ano programa cinco montaxes de teatro e circo para todo tipo de públicos.
A Axencia Galega das Industrias Culturais (Agadic), encargada da xestión da rede, e mais o Concello de Lugo realizan un investimentos conxunto de máis de 14.500 euros nesta carteleira semestral, que xa en xaneiro ofreceu na cidade Outono, peza de novo circo coa que Pistacatro está a celebrar o seu décimo aniversario.
O público infantil e familiar é o principal destinatario das próximas catro funcións en rede do Gustavo Freire, programadas sempre en domingo ás 18.30 horas. Así e tras Danza da choiva, onde Elefante Elegante aborda as consecuencias do cambio climático mesturando teatro xestual con monicreques e danza; o circo regresará a Lugo o 8 de abril con El apartamento, produción galardoada en 2017 co premio ao mellor espectáculo de rúa da Feria Europea de Artes Escénicas para Niños y Niñas, Feten, de Xixón. Esta peza da compañía leonesa Cirk About It está fundamentada nos equilibrios e saltos acrobáticos, e parte dunha situación cotiá, a convivencia nun apartamento, para explicar como a rutina pode romper con facilidade.
O 13 de maio será a quenda da formación galegobrasileira Asacocirco, que representará BB Circus, unha peza con música en directo que busca transmitir a esencia do circo ao público infantil dentro dun universo de acción, intensidade e cor.
Por último, o 10 de xuño actuará en Lugo a compañía ourensá Sarabela Teatro coa proposta de teatro infantil O secuestro da bibliotecaria. Baseada no texto de Margaret Mahy, a montaxe aborda o amor pola lectura centrando a súa trama no caos que xeran uns bandidos na vila de Parangón co secuestro da súa fermosa bibliotecaria.
A Rede Galega de Teatros e Auditorios funciona de xeito continuado desde 1996. Trátase do principal mercado interior para as propostas escénicas galegas profesionais, di a Xunta, e conta cun orzamento para este primeiro semestre de 863.714 euros (448.850 da Agadic e 414.836 das entidades locais titulares dos teatros).
Elefante Elegante continúa mañá a programación da Rede de Teatros en Lugo
Sarabela, Cirk About It e Asacocirco estarán no Auditorio ► As funcións serán en domingo, ás 18.30 e para público familiar
