Directores do Novo Cinema Galego ofrecen algunhas das súas obras online de forma gratuíta con motivo do estado de alarma polo coronavirus, que entre outras cuestións obrigou a pechar todos os cinemas do país.
En conversación con Europa Press, o impulsor desta iniciativa, o director Xurxo Chirro -xunto aos produtores Beli Martínez e Felipe Lage- explica que se ofrecen estas obras para que a xente poida "divertirse, entreterse ou estudalas" nun momento no que non se pode saír de casa.
Precisamente, este 2020 o Novo Cinema Galego, termo acuñado polo crítico Martin Pawley en 2010, cumpre unha década. Aquel ano produciuse a estrea de 'Todos vós sodes capitáns', de Oliver Laxe, obra que se pode ver online grazas a esta iniciativa.
Así, na web (http://novocinemagalego.info/10anosncg/) están cintas como 'Vikingland', do propio Xurxo Chirro; 'Arraianos', de Eloy Enciso; e 'O Quinto Evanxeo de Gaspar Hauser', de Alberto Gracia.
O cineasta Xurxo Chirro sinala que tiña pensando ofrecer de forma aberta 'Vikingland' con motivo do seu décimo aniversario -a cinta é de 2011-, pero cre que "é unha boa ocasión" para facelo "e agora xa é patrimonio de todos os galegos". É unha obra "medio de culto" con varios galardóns -como o do Play-Doc en 2012-, realizada a través de 'found footage' sobre a tripulación dun mercante galego.
Chirro valora que os creadores "vanse animando" e avanza que o mércores "haberá máis sorpresas". A idea é que só haxa unha peza de cada director para ofrecer un catálogo "máis representativo" do Novo Cinema Galego e "moito máis diverso".
Sobre a oportunidade para o público de poder acceder a estas obras, moitas das cales non son fáciles de conseguir, o autor de 'Vikingland' reflexiona sobre que "debería haber iniciativas públicas" por parte da Xunta e Agadic "para que se visen". Opina tamén que a TVG2 podería apostar "por un bo material como este para proxectar".
LISTA DE OBRAS EN CRECEMENTO
Tamén están dispoñibles, entre outros, para poder ver desde casa curtametraxes e mediometraxes de autores como Xisela Franco e Ánxela Caramés ('Hyohakusha'); Xacio Baño ('Ser e Voltar'), Sonia Méndez con 'Leo y Mario (se dejan)'; e Jaione Camborda ('Rapa das Bestas').
Outras obras son: 'Bs. As.', de Alberte Pagán; 'Montaña en Sombra', de Lois Patiño; 'N-VI', de Pela del Álamo; 'Listen to me', de Carla Andrade; 'O Cazador', de Ángel Santos; 'Fogos', de Martin Pawley e Marcos Pérez; 'Sin Dios ni Santa María', de Helena Girón e Samuel M. Delgado; 'O Porco e o seu espírito', de Adrián Canoura; 'La brecha', de Marcos Nine; 'Piedad', de Otto Roca; 'Jet Lag', de Eloy Domínguez Serén; 'VidaExtra', de Ramiro Ledo.
A lista vai crecendo co paso das horas e este mesmo martes completouse, até o momento, con: 'La declaración de los objetos', de Cristóbal Arteaga; 'Fragmentos de Brand', de Carlos Álvarez-Ossorio; e 'Visións' (filme colectivo), de Eva Calvar, Sonia Méndez, Olaia Sendón, Claudia Brenlla, Andrea Zapata-Girau, Begoña M. Santiago, Carme Nogueira, Lara Bacelo, Diana Toucedo e Carla Andrade.