A Xunta incrementou este ano nun 28% a superficie do polígono de As Gándaras

A Xunta de Galicia incrementou este ano nun 28% a superficie do polígono industrial das Gándaras ata chegar a 1.600.000 metros cadrados, ademais de sacar a licitación o proxecto de urbanización de dúas novas fases de obras (VI e VIIB) que supoñen 352.153 metros cadrados, co que a capacidade do parque pasa de 1,2 millóns a 1,6 millóns de metros cadrados. Estas actuacións enmárcanse na estratexia de desenvolvemento de solo industrial en Galicia que está a levar a cabo o Goberno galego baseada "nun desenvolvemento homoxéneo en toda a Comunidade", destacou a conselleira de Economía e Industria, María Jesús Lorenzana.
"Queremos apostar pola provincia de Lugo, pois cremos que ten moito potencial para o desenvolvemento de moitas empresas e para nós é crucial satisfacer a demanda empresarial alí onde existe", engadiu. A Xunta leva investidos case 60 millóns de euros só neste parque empresarial e ademais, no 2024 o Executivo autonómico concedeu máis de 400.000 euros para a mellora da seguridade e das infraestruturas dos polígonos que xa existen na provincia de Lugo. "Temos un compromiso con esta provincia que é clave para que toda a comunidade autónoma poida continuar co desenvolvemento industrial que estamos acelerando nos últimos anos", sinalou.

O parque empresarial das Gándaras é un parque consolidado no que xa hai máis de 130 empresas asentadas. As novas fases servirán para mellorar as redes de comunicación do polígono industrial e a súa conexión exterior, de xeito que se mellora a accesibilidade e a súa integración e consolidación na malla urbana, unha demanda histórica dos empresarios.

Este polígono conta con dous accesos coa Ronda Norte, coas rúas Aller Ulloa, Ramón María (antes rúa A) e Cardóniga Carro, Rafael (antes rúa C) e a conexión co polígono industrial a través de dous pasos elevados co polígono de O Ceao.

A ampliación establece unha nova conexión co polígono do Ceao, conectando co paso elevado sobre a vía do ferrocarril na terminal de mercancías na marxe noroeste, o que permite á súa vez un acceso máis directo a autoestrada A-6.

Ademais, mellórase a seguridade da conexión coa estrada a Muxa xa que se resolve cunha rotonda a súa conexión.

O futuro desenvolvemento da urbanización que se sacou a licitación permite ter unha disposición escalonada do solo para atender a demanda presente e futura, de xeito que mentres se rematan as obras das fases que xa están executándose, comezouse a tramitación das novas fases que posibilitarán que As Gándaras non deixe de medrar.

O Goberno galego tamén autorizou este ano o inicio das obras de edificación da nova factoría que a empresa lucense Norvento instalará no polígono empresarial das Gándaras en Lugo e que suporá un investimento de 50 millóns de euros e a creación de máis de 600 postos de traballo.

A factoría terá unha superficie de 19.429 metros cadrados, estará situada na parcela B2-B3 da fase VIIA do parque empresarial e permitirá crear 303 empregos directos, 237 indirectos e 84 empregos inducidos. A Xunta xa declarou no ano 2023 a Fábrica Norvento Enerxía Cero (neFO) como Proxecto Empresarial Singular e que permitirá construír unha planta de última xeración na que se fabricarán aeroxeneradores de vangarda, equipos de almacenamento de baterías avanzados e convertedores de enerxía modernos. 

O proxecto ten como obxectivo a construción e posta en funcionamento dunha innovadora fábrica autosuficiente e cero emisións, con aeroxeneradores de vangarda de entre 100 e 1.000 kW para producir enerxía renovable que favoreza a descarbonización industrial e impulse a repotenciación de parques eólicos. 

Así mesmo, fabricará convertedores de electrónica de potencia para a xestión e conversión de enerxía limpa a todas as escalas, que abranguen desde equipos especializados no sector comercial e industrial a produtos específicos para proxectos a escala de rede.

Ademais alimentarase exclusivamente con enerxía renovable xerada nas propias instalacións.